Býrabaıda masań kúıde kólik júrgizgen ımam 15 táýlikke qamaldy

KÓKShETAÝ. KAZINFORM – Býrabaıda masań kúıde kólik júrgizgen Qostanaıdyń bas ımamy ustaldy. Polıtsııa ákimshilik hattama toltyryp, 15 táýlikke qamaýǵa aldy. 

Mas ımamnyń ustalǵany týraly Oraz Álimbekov esimdi jeli qoldanýshysy Facebook-tegi paraqshasynda jazdy.

Ustalǵan adam Qostanaıdyń bas ımamy Tájimbet Bahytbek Nurǵabyluly ekeni aıtylady. Ony tártip saqshylary Býrabaıdaǵy «Regıon» túngi klýbynyń janynda masań kúıde «Haılandr» kóligimen ketip bara jatqanda qolǵa túsirgen. 

Jelide taraǵan er adamnyń ustalǵanyn Aqmola oblystyq sotynyń baspasóz qyzmeti rastady. Alaıda tolyq aqparat keıin joldanatynyn jetkizdi. 

Aıta ketsek, budan buryn Aqmola oblysynda tóbelesken ákim orynbasary men apparat basshysyna aıyppul salynǵanyn jazǵan edik.