Býrabaıda «Qysqy ertegi» festıvali bastaldy
KÓKShETAÝ. QazAqparat - Býrabaı kýrortynda «Four seasons» jobasy aıasynda 2017 jylǵy 20 jeltoqsannan 2018 jylǵy 20 aqpanǵa deıin «Qysqy ertegi» festıvali ótedi, dep habarlaıdy «QazAqparat» HAA tilshisi.
Eki aı boıy qysqy demalysty kóńildi ótkizý jáne Jańa jyl merekesin toılaýǵa arnalǵan túrli shoý-baǵdarlamalar, oıyn-saýyq, sport, t.b. sharalar ótkiziledi. Jobanyń basty maqsaty demalys oryndaryna týrısterdi múmkindiginshe kóbirek tartýdy, Aqmola oblysynyń týrıstik áleýetin kóterýdi kózdeıdi.
«Festıval aıasynda Aqmola oblysynyń demalys oryndary arasynda úzdik «Qysqy ertegi» jańajyldyq baǵdarlamasy boıynsha baıqaý ótedi. Eki aılyq sharany keńinen nasıhattaý úshin respýblıkalyq jáne oblystyq deńgeıde «Ákem, apam, men - sporttyq otbasymyz» teleshoýy uıymdastyrylady», - deıdi Aqmola oblystyq týrızm basqarmasyndaǵylar.
Demalys oryndarynyń jabdyqtalýy men qysqy sport jarystaryn ótkizý deńgeıin arnaıy komıssııa baǵalap otyrady. Baıqaý sońynda «Úzdik muz ertegi qalashyǵy», «Úzdik jańajyldyq baǵdarlama» jáne «Qysqy demalysty uıymdastyrý úzdigi» atalymdary boıynsha úsh jeńimpaz anyqtalady, sondaı-aq belsendi qatysqan demalys oryndaryna da yntalandyrý syılyqtary beriledi.
