Býrabaıda kólge munaı ónimderi tógilgeni ras pa

KÓKShETAÝ. KAZINFORM — Býrabaı aýdanynyń ákimdigi Şýche qalasynda kólge munaı ónimderi tógilgeni týraly vıdeojazbaǵa túsinik berdi.

«Býrabaı aýdanynyń ákimdigi kólge lastanǵan sý tógilmegenin habarlaıdy. „Jańa Turmys 2020“ JShS aqparatynsha, 2019 jyly № 20 qazandyqqa tógý kezinde aryqqa mazýt quıyldy. Sý tasqyny kezinde jerasty sýynyń kóterilýine baılanysty qurǵaq jyrada mazýt quıylǵan jerde topyraq jýyldy, saldarynan lastanǵan topyraq toǵanǵa tústi. Aqmola oblysy boıynsha ekologııa departamenti 24 mamyrda tekserý júrgizdi, qorytyndysy boıynsha osy jyldyń 1 shildesine deıin remedıatsııa josparyn ázirleý jóninde nusqama berildi», — dep túsindirdi ákimdiktiń baspasóz qyzmetinen.

Aıtýynsha, búgingi kúni «Jańa turmys — 2020» JShS men mamandandyrylǵan lıtsenzııalanǵan «EkoPromBýrabaı» JShS kásiporny birlesip jospar ázirlep jatyr.

Ol bıylǵy 28 maýsymda Aqmola oblysy boıynsha ekologııa departamentine tapsyrylady, jospar bekitilgennen keıin ony oryndaý boıynsha sharalar qabyldanady.

«Remedıatsııa jospary mamandandyrylǵan kásiporynnyń aýmaǵynda erigen sý deńgeıin tómendetý, sý burý, sý aǵynyn súzý, munaı ónimderimen lastanǵan topyraqty alý jáne joıý jónindegi is-sharalardy kózdeıdi», — dep tolyqtyrdy vedomstvodan.

Aıta ketsek, budan buryn «Býrabaı-Damý» JShS ujymy «Taza beısenbi» aktsııasyna qatysqanyn jazǵan edik.