Býrabaıda kól ortasynda qalǵan elordalyq qutqaryldy
KÓKShETAÝ. QazAqparat – Aqmola oblysynyń Aqylbaı aýyly mańyndaǵy Kishi shabaqty kólinde Nur-Cultan qalasynyń 51 jastaǵy turǵyny qutqaryldy, dep habarlaıdy QazAqparat tilshisi oblystyq TJD baspasóz qyzmetine silteme jasap.
Vedomstvonyń málimetinshe, er adam úrlemeli matraspen sýda júzbekshi bolǵan. Alaıda, qatty tolqyn ony kóldiń ortasyna qaraı alyp ketken. Sol jerde TJD jedel qutqarý jasaǵynyń qutqarýshylary ony kórip qutqarǵan.
«Kishi shabaqty kólinde patrýldeý kezinde qutqarýshylar ústinde qutqarý jıleti bar, jaǵaǵa júzip kele jatqan er adamdy kórdi. 1969 jylǵy er adam úrlemeli matraspen júzip júrgende ony tolqyn kóldiń ortasyna alyp ketken», - deıdi TJD bastyǵynyń orynbasary Qanat Dospaev.
Vedomstvodan atap ótkendeı, shomylý maýsymy bastalǵannan beri óńirdegi kólderden 50 adam qutqaryldy.
