Býrabaıda káýap qýyrǵan eki turǵyn jarty mıllıon teńgege jýyq aıyppul arqalady
ASTANA. KAZINFORM — Astananyń eki turǵyny «Býrabaı» memlekettik ulttyq tabıǵı parkiniń aýmaǵynda ot jaqqany úshin ákimshilik jaýapkershilikke tartyldy. Zań buzýshylyq ulttyq park memlekettik ınspektorlary men tabıǵatty qorǵaý polıtsııasy qyzmetkerleriniń birlesken reıdtik is-sharalary barysynda anyqtaldy.
Kezekti birlesken reıdterdiń qorytyndysy boıynsha 16 quqyq buzýshy ákimshilik jaýapkershilikke tartyldy.
Anyqtalǵan quqyq buzýshylyqtardyń qatarynda avtokólikterdiń jalpyǵa ortaq paıdalanylatyn joldardan orman alqabyna shyǵýynyń segiz faktisi, arnaıy belgilengen oryndardan tys jerde shatyr tigýdiń bes faktisi, ruqsat qujattarynsyz týrıstik qyzmet kórsetýdiń bir faktisi, sondaı-aq órt qaýipsizdigi talaptaryn, ormandardaǵy sanıtarlyq qaǵıdalardy buzý jáne qoǵamdyq oryndarda alkogoldik ishimdik ishýge qatysty eki derek tirkeldi.
Sonymen qatar polıtsııa qyzmetkerleri reıd kezinde jol qozǵalysy erejelerin buzýdyń 80 faktisin anyqtady. Olardyń ishinde qaýipsizdik beldigin taqpaı kólik basqarý, rólde otyryp uıaly telefon paıdalaný, qıylystardan ótý jáne manevr jasaý qaǵıdalaryn buzý, tehnıkalyq aqaýy bar nemese zańsyz qaıta jabdyqtalǵan kólikterdi paıdalaný, kólik quralyn basqarý quqyǵynsyz júrgizý, sondaı-aq mas kúıinde kólik basqarý faktileri bar.
Budan bólek, qoǵamdyq tártipti buzý, onyń ishinde tynyshtyqty buzý jáne qoǵamdyq oryndarda azamattarǵa tıisý áreketteriniń joly kesildi.
Ulttyq park ákimshiligi órt qaýpi joǵary kezeńde arnaıy jabdyqtalǵan oryndardan tys jerde ot jaǵýǵa jáne ashyq otty paıdalanýǵa tyıym salynatynyn eskertti. Qazaqstan Respýblıkasynyń zańnamasyna sáıkes, órt qaýipsizdigi talaptaryn buzǵany úshin ákimshilik jaýapkershilik kózdelgen. Keıbir jaǵdaılarda aıyppul mólsheri 100 aılyq eseptik kórsetkishke (AEK) deıin jetip, shamamen 430 myń teńge bolady.
Demalýshylardyń jaıly ári qaýipsiz demalysyn qamtamasyz etý maqsatynda «Býrabaı» memlekettik ulttyq tabıǵı parkiniń aýmaǵynda 50 pıknık aımaǵy jabdyqtalǵan. Bul oryndarda taǵam daıyndaýǵa qajetti barlyq jaǵdaı jasalǵan jáne dál osy jerlerde órt qaýipsizdigi talaptaryn saqtaı otyryp, mangal qoldanýǵa jáne as ázirleýge ruqsat etiledi.
Eske salaıyq, buǵan deıin Almaty ormandarynda ot jaqqan 100-den astam adam jaýapqa tartylǵanyn habarlaǵanbyz.
