Býrabaıda halyqaralyq kóshpendiler taǵamdary festıvali ótip jatyr
ASTANA. QazAqparat - Alǵash «Nomad Food» halyqaralyq gastronomııalyq festıvali aıasynda aspazdar saıysy ótýde, dep habarlaıdy QazAqparat tilshisi.
Halqymyzdyń qonaqjaılylyǵyn dáripteý men aspazdardyń ózara tájirıbe almasý maqsatyn kózdegen shara Qazaqstanda tuńǵysh ret uıymdastyrylyp otyr.
Festıvalǵa Qazaqstan, Reseı, Ózbekstan, Serbııa, Rýmynııa elderiniń aspazdary qatysýda. Aspazdar saıysyna 14 komanda, onyń 4-ýi sheteldik, barlyǵy 47 úmitker qatysýda. Aspazdar 3 nomınatsııa boıynsha baq synaıdy ıaǵnı jeke, komandalyq jáne jas aspazdar saıysy boıynsha. Úzdik degen aspazdar men komandalarǵa oryndar men baǵaly syılyqtar tabys etiledi. 
«Búgin Býrabaıǵa elimizben qatar alys jaqyn sheteldiń eń úzdik aspazdary jınaldy. Sondyqtan bundaı festıvalǵa kelmesime bolmady. Bizdiń Býrabaıdy damytýdaǵy basty mindetterdiń biri ol - sapaly qyzmet kórsetý. Sapaly qyzmet kórsetýdiń qataryna taǵamnyń sapasy men dámi kiredi. Sebebi, týrıster qyzmet kórsetý sapasyn baǵalaǵanda 100-den 25% astyń dámdi bolýyna nazar aýdarady. Osy turǵyda aspazdardyń alatyn orny mańyzdy. Búgingi kóshpendiler festıvali tek qana jarys emes sonymen qatar aspazdardyń ózara tájirıbe almasýy men bir-birimen baılanys ornatýyna jasalǵan jaqsy múmkindik. Aldaǵy ýaqytta aıtýly sharanyń aıasy keńeıip, dástúrli túrde jyl saıyn ótkiziledi dep senemin», - dedi Aqmola oblysynyń ákimi Málik Myrzalın. 
Sonymen qatar shara barysynda otandyq jáne sheteldik belgili aspazdar sheberlik sabaqtaryn ótkizip, óz tájirıbelerimen bólisýde.
Odan bólek festıval aıasynda Aqmola oblysynyń kásipkerlik jáne ónerkásip basqarmasynyń uıymdastyrýymen «Organic Food» atty aýyl sharýashylyq taýar óndirýshiler kórmesi uıymdastyryldy.
Aıtýly sharany QR Ulttyq aspazdar assotsıatsııasy Aqmola oblysynyń týrızm basqarmasynyń qoldaýymen ótkizýde.
