Býrabaıda geımıfıkatsııa elementteri bar ekomarshrýt ashyldy
ASTANA. KAZINFORM – «Býrabaı» ulttyq parkinde týrısterdiń jaıaý júrýine arnalǵan «Bólektaý» joly abattandyryldy.
Zamanaýı ári qaýipsiz baǵyt týrıster úshin jańa tartymdy orynǵa aınalmaq.
Tsıfrlyq sheshimderdiń qoldanylýy onyń ereksheligine aınalmaq. Meımandar joldy QR-kodtardy, aýdıogıdti jáne Telegram-botty qoldanyp, kvest formatynda óte alady. «Bólektaý» ekologııalyq baǵyty tabıǵaty kórkem aýmaq arqyly ótedi. Ol kireberis arkadan bastalyp, demalys aımaǵyndaǵy samaljaıǵa jetpeı aıaqtalady.
Buǵan deıin osy qashyqtyqtaǵy jol taýǵa shyǵatyn týrısterge qaýip tóndirýi múmkin baǵyttardyń biri sanalǵan. Endi abattandyrylǵan marshrýt belsendi saıahatshylardan bastap balalary bar otbasylarǵa deıingi kelýshilerdiń keń aýqymyna da qoljetimdi boldy.
— Ekologııalyq jáne tanymdyq týrızmdi damytý — basty basymdyqtarymyzdyń biri. Bul salaǵa jeke sektordyń belsendi atsalysýy asa mańyzdy. Býrabaıdaǵy ekomarshrýttyń abattandyrylýy — bıznestiń uzaqmerzimdi, áleýmettik mańyzdy bastamalarǵa ınvestıtsııa sala alatyndyǵynyń naqty úlgisi. Bul tek týrıstik ınfraqurylymdy jaqsartýmen shektelmeı, tabıǵatqa degen jaýapkershilikti de qalyptastyrady. Bıznestiń memleketpen tıimdi áriptestigi turaqtylyqty, qoljetimdilik pen sapany damytýǵa yqpal etedi, — dep atap ótti «Kazakh Tourism» UK» AQ basqarma tóraǵasynyń mindetin atqarýshy Danıel Serjanuly.
Baǵyt boıynda Bólektaýdyń florasy, faýnasy jáne ańyzdary týraly aqparattyq stendter ornatylǵan.
Sonymen birge qazaq, orys jáne aǵylshyn tilderindegi aýdıogıdti qoldanýǵa qajetti QR-kodtar qarastyrylǵan. Yńǵaıly joldy abattandyrý kezinde ekologııalyq taza materıaldarǵa erekshe mán berildi.
Ortalyq stend kún sáýlesi túsken kezde aýany tazartatyn ınnovatsııalyq fotokatalıtıkalyq jabynmen jasalǵan. Jaıaý júretin týrıster úshin ekologııalyq joldyń ashylýy Aqmola oblysy úshin úlken mańyzǵa ıe. Alǵashqy kelýshiler bul marshrýttan ótip, aýdıogıdti synap kórip, kvest tapsyrmalaryn baǵalaýǵa múmkindik aldy.
Eske salsaq Astana — Býrabaı baǵytynda taǵy bir qosymsha elektr poıyzy qatynaıtyn boldy.