Býrabaıda genderlik sezimtaldyqty arttyrýdy oqytatyn halyqaralyq trenıng bastaldy
ASTANA. Sáýirdiń 22-i. QazAqparat /Serik Sabekov/ - Beısenbi kúni Býrabaıda QR Parlament depýtattary jáne mınıstrlikter men vedomstvolardaǵy memlekettik qyzmetkerler úshin genderlik sezimtaldyqty arttyrýdy oqytatyn halyqaralyq trenıng bastaldy, dep habarlaıdy QR Prezıdenti janyndaǵy Áıelder isi jáne otbasy-demografııalyq saıasaty jónindegi Ulttyq komıssııanyń baspasóz qyzmeti.
Sharany uıymdastyrýshylardyń aıtýynsha, eki kúndik halyqaralyq trenıngtiń negizgi maqsaty - qatysýshylardyń genderliktiń keleli máseleler jıyntyǵy boıynsha bilimin arttyryp, sondaı-aq genderlik teńdikke jetýde ulttyq tetiktiń jumys isteýi úshin memlekettik organdar úshin usynys jasaý.
«Jattyqtyrýshylar retinde halyqaralyq jáne ulttyq sarapshylar shaqyrylǵan. Jattyqtyrýshylar trenıng qatysýshylaryn ártúrli memleketterdegi genderlik saıasattyń júzege asyp jatqan tájirıbesimen tanystyryp, memlekettik organdardyń genderlik saıasattyń ilgeri basýyndaǵy róli, memlekettik organdar men azamattyq qoǵamdaǵy genderlik teńdiktiń damýy, sondaı-aq erler men áıelderdi teń quqyq jáne teń múmkindikpen qamtamasyz etýdiń memlekettik qurylymy aıasyndaǵy máselelerdi talqylaıdy», delingen baspasóz ortalyǵynyń habarlamasynda.
Trenıngti uıymdastyrýshylar - Qazaqstandaǵy BUU Damý baǵdarlamasymen birlese QR Prezıdenti janyndaǵy Áıelder isijáne otbasy-demografııalyq saıasat boıynsha Ulttyq komıssııa.
