Býrabaıda elimizdiń jas patrıottary bas qosýda
KÓKShETAÝ. QazAqparat - Býrabaıdaǵy «Baldáýren» respýblıkalyq oqytý saýyqtyrý ortalyǵynda «Patrıotızm - Rýhanı jańǵyrýdyń berik irgetasy» 2-shi respýblıkalyq jas patrıottar forýmy ótedi, dep habarlaıdy QazAqparat tilshisi.
Forýmǵa qazaqstandyq jas patrıottar akademııasynyń músheleri, delegatsııa jetekshileri, «Rýhanı jańǵyrý» baǵdarlamasynyń menedjerleri, erlikpen tanylǵan oqýshylar, patrıottyq tárbıe boıynsha «Men - óz elimniń azamatymyn!» atty respýblıkalyq baıqaýdyń jeńimpazdary qatysatyn bolady.
Ortalyq dırektory Muhıtdın Tólepbaıdyń aıtýynsha, forýmǵa qatysýshylardyń alǵashqy legi Býrabaıǵa kelip jatyr. Qatysýshylar toptarǵa bólinip jaıǵastyrylýda. Olarǵa túrli mádenı, sporttyq sharalar qarastyrylǵan. Jalpy, forýmǵa 187 bala men 34 eresek qatysady dep josparlanǵan.
«Búgingi kúni elimizde patrıotızm jáne azamat tárbıeleý ıdeıasynyń qoǵamdyq mańyzy artyp, memlekettik mańyzdaǵy tapsyrmaǵa aınalyp otyrǵan jaıy bar. Óıtkeni, búgingi jastar Qazaqstannyń jarqyn bolashaǵy. Sondyqtan, elimizdiń eń ásem jeri Býrabaı baýraıynda osyndaı ıgi sharany ótkizýdiń mańyzy men máni zor», - dedi ortalyq dırektory M.Tólepbaı.
Al aqpannyń 22-si kúni «Patrıotızm - Rýhanı jańǵyrýdyń berik irgetasy» 2-shi respýblıkalyq jas patrıottar forýmynyń saltanatty ashylýy bolady.
Forýmnyń kestesine saı onyń barysynda patrıottar akademııasynyń jańa músheleri qatarǵa qabyldanady. Sonymen qatar, «Men - óz elimniń azamatymyn!» baıqaýynyń qorytyndysy shyǵarylyp, jeńimpazdary marapattalady.
Sondaı-aq, «Patrıottyq tárbıe: rýhanı jańarý aıasynda». «Qazaqstandyq jas patrıottar Akademııasynyń keleshektegi jumys jospary» taqyrybynda baspasóz máslıhaty ótedi.
Eske sala keteıik, «Baldáýren» respýblıkalyq oqý-saýyqtyrý ortalyǵy «Artek» Halyqaralyq balalar ortalyǵynyń úlgisinde Elbasy N.Á.Nazarbaevtyń tapsyrmasymen ashylǵan bolatyn. Ortalyq elimizdiń eń kórikti jerleriniń biri Býrabaı kýrorty aımaǵynda Şýche kóliniń jaǵasynda ornalasqan.
