Býrabaıda ekologııalyq qaýipsiz bıootyn óndirilýde
KÓKShETAÝ. QazAqparat - Aqmola oblysynyń Býrabaı aýdanynda ekologııalyq qaýipsiz bıootyn (pellet) óndirilýde. Orman sharýashylyǵy qaldyqtarynan syqpa túıirshikter daıyndaýmen jergilikti «Orman aımaǵy» JShS aınalysady, dep habarlaıdy QazAqparat tilshisi.
«Orman sharýashylyǵy» JShS ekologııalyq taza otyn shyǵaratyn Qazaqstandaǵy tuńǵysh kásiporyn. Kompanııa alǵashqy zaýytty Petropavl qalasynda iske qosqan bolatyn. Al, ótken jyldyń qarasha aıynda paıdalanýǵa berilgen Býrabaıdaǵy kásiporyn qazirdiń ózinde 500 tonna bıootyn daıyndap úlgerdi. Mundaǵy zaýyttyń jyldyq qýaty 3000 tonnaǵa eseptelgendigin eskersek, aldaǵy ýaqytta mańyzdy istiń qarqyn alatyny belgili.
Kompanııa basshysy Andreı Petrochenkonyń sózinshe, bıootynnyń jylý berý qýaty kómirden esh kem túspeıtin kórinedi.
«Pellet Eýropa elderinde, AQSh, Japonııa, Reseıde otyn retinde erteden paıdalanylatynyn aıtady. Aǵash qaldyqtarynyń syqpa túıirshikteri - joǵary qunarly otyn. Munyń paıdaly koefıtsıenti 95 paıyzdy qurasa, kómir men gazdyń kórsetkishi, sáıkesinshe 50 jáne 30 paıyzǵa teń. Naqtylaı tússek, jylý berý qýaty kómirmen teń eki tonna pellet qymbat baǵaly dızel otyny men suıytylǵan gazdyń bir tonnasyn almastyra alady»,-deıdi Andreı Petrochenko.
Bıootynnyń bir tonnasynyń quny 35 myń teńgege baǵalanýda jáne buǵan degen suranys kún saıyn óse túsýde. Qazirgi kúni kompanııa bıologııalyq taza ónimdi respýblıka aýmaǵyna jetkizýmen qatar, Qytaıǵa da eksporttaýda.
Balamaly otyn óndirisi jobasy quryltaıshynyń jeke qarjysy esebinen iske asyryldy. Býrabaıdaǵy zaýyttyń ıgilikke jaratylýyna 120 mıllıon teńge jumsalǵan. 
