Býrabaıda demalýshynyń kóptigine baılanysty blokpost ornatý usynyldy
Demalys kúnderi «Býrabaı» ulttyq tabıǵı parkindegi jaǵajaılarda ıne shanshar oryn bolmaıdy. Demalýshylardy sýǵa shomylýǵa resmı túrde salynǵan tyıym da, tipti «jaǵajaılar karantınge baılanysty jabyq» dep jazylǵan resmı taqtaısha da toqtata almady. Sanıtarlyq normalardy saqtamaı, saqtyq sharalaryn umytyp, myńdaǵan demalýshy bos ýaqytyn jaǵajaıda ótkizýde. Jaýapty tulǵalar men polıtsııa qyzmetkerleri reıd júrgizýde, biraq týrıster olardan qaımyqpaıdy.
Býrabaıdaǵy arnaıy jabdyqtalmaǵan birneshe shaqyrym jaǵajaı adamǵa toly.
Sanıtarlyq norma, maska rejimi men áleýmettik qashyqtyq týraly sóz qozǵaýdyń ózi qıyn. Polıtseıler reıd kezinde tekserip jatyr. Alaıda, karantındi buzýshylardyń kópshiligine aýyzsha eskertý ǵana aıtylady. Shekteý sharalary engizilgen sátten bastap 8 adamǵa ǵana aıyppul salynǵan.
«Olardan jazbasha túsinikteme, jeke kýáliktiń kóshirmesi alynady, ákimshilik materıaldar rásimdelip, aqparatty esepke alý kitabyna (AEK) tirkeledi, sodan keıin isti Taýarlar men qyzmetterdiń sapasy men qaýipsizdigin baqylaý bólimine tapsyrady. Bul mekemeniń qyzmetkerleri ákimshilik hattama toltyrady. Bul 2-den 3 saǵatqa sozylady», - dedi Býrabaı aýdany ákimi apparatynyń basshysy Qasymhan Májikov.
«Adamdar jaýapkershilikti sezinbegendikten osyndaı jaǵdaı qalyptasty. Meniń oıymsha, ony toqtatýdyń jalǵyz ǵana joly - TJ rejimindegideı blokpost qoıý», - dedi aýdannyń bas sanıtar dárigeri Seraly Joldospaev.
