Býrabaıda balyqtyń jappaı qyrylýyna baılanysty tekserý bastaldy

BÝRABAI. QazAqparat - QR Ekologııa, geologııa jáne tabıǵı resýrstar mınıstrligi Býrabaı kólinde shabaqtardyń qyrylýyna qatysty pikir bildirdi, dep habarlaıdy QazAqparat.

Aıta keteıik, taıaýda Aqmola oblysy Býrabaı kólinde qyrylǵan balyqtardyń vıdeosy áleýmettik jelide taraǵan bolatyn.

«Janýarlarǵa qaýip tóngende áreket etý mehanızmine sáıkes, 13 qyrkúıek kúni Aqmola oblysy aýmaqtyq orman sharýashylyǵy jáne janýarlar álemi ınspektsııasynyń qyzmetkerleri «Býrabaı» memlekettik ulttyq tabıǵı parkindegi sý qoımasyna bardy. Sý qoımasynyń jaǵalaý syzyǵy zertteldi. 6 kg shabaq balyq jınalyp, ýtılızatsııalandy» dep málim etti vedomstvodan.

Zerthanalyq zertteý júrgizý úshin sý men balyqtan synama alyndy. Balyqtyń qyrylý sebebi zerthana saraptamasynyń nátıjesi shyqqannan keıin qosymsha habarlanady.

Qazir «Býrabaı» ulttyq parki qyzmetkerleri shabaq balyqtardy qutqarý jumysyn júrgizip jatyr.