Býrabaıda balyq aýlaýǵa ketken 29 jastaǵy jigit óli tabyldy
KÓKShETAÝ. QazAqparat – Aqmola oblysynyń Býrabaı aýdanynda joǵalǵan 29 jastaǵy er adam óli kúıinde tabyldy, dep habarlaıdy QazAqparat tilshisi aýmaqtyq Tótenshe jaǵdaılar departamentiniń baspasóz qyzmetine silteme jasap.
Vedomstvonyń deregi boıynsha, 12 qańtar kúni saǵat 11:25 shamasynda Aqmola oblysynyń TJD 112 telefon nómirine Şýche kólindegi ıaht-klýbtyń balyqshylar turaǵynda adamnyń denesi tabylǵany týraly habar túsken. Oqıǵa ornyna Býrabaı aýdandyq Tótenshe jaǵdaılar basqarmasy bastyǵynyń mindetin atqarýshy, azamattyq qorǵanys podpolkovnıgi K.Babaev bastaǵan jedel top bardy.
«Sol kúni saǵat 11:40 shamasynda balyqshylar turaǵynda 1991 jylǵy er adamnyń denesi tabyldy. Ony marqumnyń ákesi anyqtap, Býrabaı aýdandyq aýrýhanasyna jetkizgen. Alaıda, dárigerler onyń sol kúni tańǵy saǵat 09:00 shamasynda qaıtys bolǵanyn tirkedi. Ákesiniń aıtýynsha, balasy tanystarymen birge Şýche kóline barǵan. Keıin uzaq ýaqyt baılanysqa shyqpaǵan soń dostaryna habarlasqan. Dostary baryp, onyń óli kúıinde taýyp, ákesine habarlasqan», - deıdi vedomstvodan.
Oqıǵa ornyna sondaı-aq Býrabaı aýdandyq polıtsııa bóliminiń shuǵyl-tergeý toby barǵan.
Aldyn ala málimet boıynsha, er adamǵa ıis tıgen. Onyń denesi máıithanaǵa jiberilip, sot-medıtsınalyq saraptama taǵaıyndaldy.
