Býrabaıda balalar men jastardyń VII sammıti ótti

KÓKShETAÝ. QazAqparat - Býrabaı aýdanynda jastar qozǵalysy men balalar arasynda «Biz HHІ ǵasyrdyń balalarymyz: bizdiń múmkindikterimiz ben quqymyz» atty VII sammıt ótti, dep habarlaıdy «QazAqparat» HAA tilshisi.

Aqmola oblystyq ishki saıasat basqarmasy men respýblıkalyq «Juldyz» balalardyń qoǵamdyq uıymdary odaǵy»  qoǵamdyq birlestiginiń uıytqy bolýymen, oblystyq bilim basqarmasynyń qoldaýymen ótken shara Elbasynyń «Bolashaqqa kózqaras: qoǵamdyq sanany jańǵyrtý» tujyrymdamasy aıasynda júzege asyrylyp otyr. Oǵan QR Bilim jáne ǵylym mınıstrligi, «Nur Otan» ókilderi, zertteýshiler, balalardyń qoǵamdyq birlestiginiń kóshbasshylary, múgedek balalardyń ata-analary qaýymdastyǵy, muǵalimder, psıhologtar, túrli memlekettik jáne qoǵamdyq uıymdardyń ókilderi qatysty.    

«Mundaı sharalar balǵyndardyń shyǵarmashylyq qabiletterin shyńdaýǵa zor múmkindik bermek. Sondaı-aq, óskeleń urpaqtyń boıynda otansúıgishtikti, áleýmettik jáne bastamashyl quzyretti azamattyń bet-beınesin qalyptastyrý bolyp tabylady. Bul Elbasy maqalasynda kóterilgen máselelerdi iske asyrýdyń birden-bir joly», - dep atap ótti respýblıkalyq «Juldyz» balalardyń qoǵamdyq uıymdary odaǵy»  qoǵamdyq birlestiginiń prezıdenti Elena Dmıtrıenko.

Úsh kúnge jalǵasqan sammıtte Aqmola oblysyndaǵy 30-dan astam balalar uıymdarynyń ókilderi úshin túrli qyzyqty sharalalar ótkizildi.

Sammıttiń alǵashqy kúninde Aqmola oblysy memlekettik qyzmet isteri jáne jemqorlyqqa qarsy is-qımyl departamentiniń ókilderi «Adal urpaq-2017» sletin uıymdastyrdy. Odan ári «HHІ ǵasyrdyń balalary mádenıet pen beıbitshilik jolynda» atty ǵylymı-tájirıbelik konferentsııaǵa ulasty. Onda balalar uıymdarynyń jetekshileriniń óz tájirıbelerine súıene otyryp, jastardyń quqyqtary men múmkindikteri týraly jasaǵan baıandamalary tyńdaldy.

Shara eresekter men balalardy marapattaý jáne kóshbasshylardyń balymen máresine jetti.