Býrabaıda balalar -16 gradýs sýyqta otyr: turǵyndar dabyl qaqty
ASTANA. KAZINFORM – Býrabaı kentiniń turǵyndary sońǵy kúnderi páterindegi jylýdyń tómendep ketkenine shaǵym aıta bastady. Al búgin olardyń aıtýynsha, aımaqtyń mektebi de sýyq bolyp ketken.
Aıaz kúsheıgeli beri Býrabaıda keıbir úılerde bólme temperatýrasy tómendep, turǵyndar qosymsha jylytqyshtardy qosýǵa májbúr. Turǵyndardyń aıtýynsha, eń alańdatarlyq jaǵdaı – mekteptegi sýyq.
– Balalarymyzǵa mektepte jylý berińizder! 40 mınýt boıy -16 gradýs sýyqta, mektep formasymen ózderińiz otyryp kórińizder, – dep jazdy turǵyndardyń biri ortaq chatta.
Býrabaı kentiniń ákimi Serikbolsyn Hasenov sońǵy ýaqytta turǵyndardan jylýǵa qatysty shaǵym túskenin rastady.
– Iá, keıbir úılerde jyly, keıbirinde sýyq. Kesheli beri arnaıy brıgada úılerdi aralap, árbir jylý torabyn tekserip jatyr. Al qazandyqta jeltoqsannyń sońynan beri jumys turaqty, ózgeris joq, – dedi ákim.
Sonymen qatar turǵyndar chatqa qazandyqtyń vıdeosyn joldap, tútin tek bir murjadan ǵana shyǵyp jatqanyn alǵa tartqan.
– Qazandyqta Viessmann de, GSJ de jumys istep tur. Biz turǵyndarǵa qazandyqtan vıdeo da túsirip jiberdik. Biraq jurt senbeı otyr, – dep túsindirdi Serikbolsyn Hasenov.
Al mekteptegi jaǵdaıǵa qatysty ákim buryn shaǵym bolmaǵanyn, oqý ornynyń dırektorymen turaqty baılanysta ekenin aıtty.
– Qazir chatta termometrdiń sýretteri tarap jatyr, biz mektepke de brıgada jiberdik. Meniń kúdigim – keıbir turǵyndar jeke sorǵylardy qosady, sonyń saldarynan basqa úıler men nysandar jylýsyz qalady. Buryn Býrabaıda sorǵylar óte kóp bolǵan. Qoldan kelgenshe anyqtap, alyp tastap jatyrmyz. Biraq bárin qamtý fızıkalyq turǵyda múmkin emes. Keı úıler tekserýge kirgizbeıdi. Bul – jeke sektor, tipti polıtsııamen de ruqsatsyz kire almaımyz, – dedi ol.
Ákimniń aıtýynsha, jylý mamandary jaǵdaı turaqtalǵansha kenttegi jylýmen qamtýdy turaqty túrde baqylap, rettep otyrady.
Aıta keteıik, buǵan deıin Petropavldaǵy JEO-2 qatty aıazǵa baılanysty kúsheıtilgen rejımde jumys istep jatqany habarlanǵan edi.