Býrabaıda áıelder basketbolynan jastar arasyndaǵy sheberlik sabaqtary ótedi

Bul  týraly atalmysh baǵdarlama boıynsha  AQSh-tyń Denver qalasynda ótken halyqaralyq chempıonattan oralǵan sportshylardyń búgin Almatyda ótkizgen baspasóz máslıhatynda aıtyldy.

«Biz qyzyqty da tyǵyz keste boıynsha Vashıngton, Denver qalalarynda boldyq. Basqa da qatysýshylarmen túrli sharalar aıasynda qoıan-qoltyq jumys isteý barysynda sporttyń bizdi qanshalyq jaqyndastyra alatynyn túsindik», - deıdi qyzylordalyq Áıgerim Aqpan. Al "Taraz» basketbol klýbynyń jattyqtyrýshysy Tatıana Goncharovanyń aıtýynsha, bul baǵdarlama  Qazaqstanda óz jalǵasyn tappaq.  Olar  endi Býrabaıdaǵy «Jaqsy» sport bazasynda áıelder basketbolynan jastar arasyndaǵy alǵashqy sheberlik sabaqtaryn ótkizgeli otyr.

Jalpy bul baǵdarlamanyń basty maqsaty - qyz-kelinshekterdi sportqa kóptep tartý. Qazaqstandyq sportshylar men bapkerlerdiń AQSh-taǵy  sapary 3 aptaǵa sozyldy. Oǵan qatysýshylar kóshbasshylyq qabiletine, sportqa beıimdigine jáne aǵylshyn tilin meńgerýine qaraı iriktelip alynǵan kórinedi. Sportshy qyzdardyń aıtýynsha, onda olar  amerıkandyqtardyń tynys-tirshiligi,  mádenıeti jáne    sporttyń AQSh qoǵamyndaǵy rólimen tanysqan. Basketbol oınaýdyń qyr-syryn úırený, toptasa oınaı bilý jáne  kóshbasshylyq trenıngteri men ózge de semınarlarǵa  da qatysyp, sportqa qatysy bar qoǵamdyq uıymdardyń ókilderimen kezdesken.  Sondaı-aq  AQSh Memlekettik hatshysy Hılları Klıntonmen  júzdesip,  sýretke túsken.