Býrabaıda áýejaı salý máselesi pysyqtalyp jatyr — oblys ákimi

ASTANA. KAZINFORM — Aqmola oblysy — Qazaqstandaǵy týrızm draıveriniń bestigine kiredi. 

Búgin Aqmola oblysynyń ákimi Marat Ahmetjanov ortalyq kommýnıkatsııalar qyzmeti alańynda óńirdiń áleýmettik-ekonomıkalyq damý áleýeti týraly esep berip, BAQ ókilderiniń saýalyna jaýap berdi. Óńir basshysy qozǵaǵan taqyryptyń biri týrızm salasy. 

— Jarty jyldyqtyń qorytyndysy boıynsha týrızm salasynda oń serpin baıqalady. Atap aıtqanda, kórsetilgen qyzmettiń kólemi ótken jylmen salystyrǵanda 121%-ǵa artty, 14 mlrd teńgege qol jetkizildi. Týrıster legi 900 myń adam, aldyn ala boljam boıynsha jyldyq kórsetkish 1,5 mln adamnan asady. Şýchınsk-Býrabaı kýrorttyq aımaǵy elde týrızmdi damytýdyń úsh ortalyǵynyń biri bolyp aıqyndaldy, — dedi Marat Ahmetjanov.

Ákimniń aıtýynsha, búginde kýrorttyq aımaqty 2029 jylǵa deıin damytýdyń keshendi jospary bekitildi. 

— Bıyl kýrorttyń eń kórkem jerlerinde 8 alań, 10,2 shaqyrym zamanaýı velojol salyndy. Oıyn elementteri bar biregeı Bólektaý eko jaıaý joly ashyldy. Osy týrızmdik maýsymda alǵash ret tikushaq ekskýrsııasy iske qosyldy. Sonymen qatar Astanamen tikeleı qatynas ornatý úshin shaǵyn áýejaı ashý máselesi pysyqtalyp jatyr, — dep qorytyndylady oblysy basshysy.

Aıta keteıik, buǵan deıin Marat Ahmetjanov Aqmola oblysynda apatty jaǵdaıdaǵy jáne úsh aýysymdy mektepter máselesi tolyq sheshilgenin málim etti. 

Buǵan deıin habarlaǵanymyzdaı bıyl 7 myńnan astam aqmolalyq turǵyn úı jaǵdaıyn jaqsartty. 

Bıyl Aqmola oblysynyń dıqandary rekordtyq kólemde astyq jınady. 

Eske sala keteıik, Aqmola oblysynda astyqty tereń óńdeıtin alǵashqy zaýyt qurylysy bastaldy. 

Sondaı-aq 2026 jyly Qosshyda jańa elektr energııasy stantsııasy salyna bastaıdy.