Býrabaıda Aqbura Bay Trail-4 halyqaralyq jarysy ótti
KÓKShETAÝ. KAZINFORM — Býrabaıda júgirýden Aqbura Bay Trail-4 halyqaralyq jarysy ótti.
«Býrabaı damý» JShS qoldaýymen Tengri Ultra, Irbis Race jáne Race Nation sııaqty tabysty jobalarymen tanymal «Ekstremaldy Atletıka» qoǵamdyq birlestigi men Tengri Runners (BIG3) júgirý klýby uıymdastyrǵan jarysqa 11 elden myńnan astam júgirýshi qatysty.
Olardyń arasynda Frantsııa, Ulybrıtanııa, Ispanııa, Reseı tárizdi elderden tanymal sportshylar men blogerler bar.
Jarysqa qatysýshylar Aqbýra kýrortynyń aýmaǵynan bastap, Býrabaı ulttyq saıabaǵynyń kórkem jerleri, sonyń ishinde Úlken Shabaqty jáne Kishi Shabaqty kólderi aýmaǵy arqyly júgirip ótti.
Jınalǵandar áýesqoı sportshylarǵa jankúıerlik tanytyp qana qoımaı, Býrabaı kýrortynyń ásem tabıǵatyn tamashalady.
«Ortalyq Azııada jáne Qazaqstan Respýblıkasynda salaýatty ómir saltyn nasıhattaý maqsatynda jyl saıyn Býrabaı kýrortynda júgirýden Aqbura Vay Trail-4 halyqaralyq jarysyn ótkizip turamyz. Ásirese, shet elderden keletin qatysýshylar sany artyp keledi. Bul óńirde týrızmdi damytýǵa jáne týrısterdiń tartýǵa septigin tıgizedi», — dedi «Býrabaı damý» JShS bas dırektorynyń orynbasary Shyńǵys Orazalın.
Jarys qorytyndysy boıynsha erler arasynda 51 km qashyqtyqty 4 saǵat 30 mınýt 28 sekýndta júgirip ótken Astana qalasynyń turǵyny Bolat Janǵazıev, 23 km qashyqtyqta Reseıden kelgen Roman Gýseınov, 11 km qashyqtyqta qostanaılyq Dáýir Dospulov márege birinshi keldi.
Al áıelder arasynda 51 km qashyqtyqty 4 saǵat 46 mınýt 58 sekýndta eńsergen qaraǵandylyq Lılııa Makeeva, 23 km qashyqtyqta astanalyq Marııa Akaeva, 11 km qashyqtyqta qostanaılyq Tatıana Nerojak jeńimpaz atandy.
Іs-shara ploggıngpen, ashyq aspan astynda júgirýmen aıaqtaldy, onyń barysynda júgirýshiler jerde jatqan qoqystardy jınady.
Aıta ketsek, budan buryn Býrabaıda 300 astam adamnyń qatysýymen PikeMan chellendji ótken edi.
