Býrabaıda alǵash ret jappaı júzýden jarys ótti
KÓKShETAÝ. QazAqparat - Şýchınski-Býrabaı kýrorttyq aımaǵynda «Burabay Swim 2018» atty jappaı júzýden alǵashqy saıys ótti, dep habarlaıdy QazAqparat tilshisi «Visit Aqmola» týrıstik aqparattyq ortalyǵyna silteme jasap.
Býrabaı aýdanyndaǵy Býrabaı kólinde Qazaqstandaǵy alǵashqy «Burabay Swim 2018» atty jappaı júzýden jarys ótti. Ol Oceanman jáne X-Water syndy álemdik júzý saıystarynyń analogy retinde uıymdastyryldy.
«Burabay Swim 2018» «Four seasons» tujyrymdamasyn júzege asyrý aıasynda jáne «Rýhanı jańǵyrý» baǵdarlamasynyń negizinde, sondaı-aq, elordanyń 20 jyldyǵyna oraı ótkizilip jatyr. Sharanyń negizgi maqsaty - sportpen jappaı aınalysýǵa shaqyrý, halyqty salaýatty ómir saltyna beıimdeý, júzýdi unatatyn adamdardyń sporttyq sheberlikterin jetildirý men ishki jáne kirme týrızmdi damytý boldy», - deıdi vedomstvoda.
Júzý saıysyna qatysýshylar 1 nemese 4,5 shaqyrym (qalaýy boıynsha) qashyqtyqty júzip ótken.
Eń jas astanalyq qatysýshy Tımýr Stenın - nebary 17 jasta, al 51 jastaǵy Almaz Jákeev - qatysqandardyń ishindegi eń eresegi boldy.
Qaraǵandydan kelip qatysqan Aleksandr Iotsýs 4,5 shaqyrymǵa júzýden 1-oryndy jeńip aldy. Ol bul qashyqtyqty 56 mınýt, 2 sekýndta júzip ótip, eń úzdik nátıje kórsetti. 2-shi oryndy astanalyq Dmıtrıı Derevıanko alsa, onyń jerlesi Ekaterına Rýdenko 3-shi orynǵa jaıǵasty.
1 shaqyrymǵa júzýde Petropavl qalasynyń turǵyny Darıa Kýtıkova kósh bastady. Ol bul qashyqtyqty 17 mınýt 46 sekýndta júzip ótti. 2-shi oryndy Qanat Janatov jeńip aldy. Al astanalyq Muhamed-Qaıdar Ismaǵulov 3-shi orynǵa jaıǵasty.
