Býrabaıda alǵash ret sýda júzýden X-WATERS KAZAKHSTAN - 2024 jarysy ótti

KÓKShETAÝ. KAZINFORM – Býrabaı kýrortynda elimizde alǵash ret sýda júzýden «X-WATERS KAZAKHSTAN - 2024» jarysy ótti. Bul sýda júzýden «X-WATERS» halyqaralyq serııasynyń Qazaqstanda ótip otyrǵan kezeńi.

Osynaý tarıhı oqıǵanyń Býrabaıda ótip otyrǵany tekten tek emes, kýrort elimizdegi tumsa tabıǵaty, saf aýasymen tanymal sulý jerlerdiń biri sanalady. Osyndaı ásem jerge demalýǵa keletin týrısterdiń de sany jyldan jylǵa artyp keledi. Ol úshin túrli buqaralyq sporttyq sharalar uıymdastyrylyp turady.

«Búgingi ótkizilip otyrǵan «X-WATERS KAZAKHSTAN - 2024» jarysy jaı ǵana kóńil kóteretin is-shara emes, sport pen birliktiń merekesi bolyp tabylady. Jarysqa kásibı sportshylarmen birge áýesqoılar, eresekter jáne balalar qatysyp, kúshterin synap kórdi. Qatysýshylar jarys erejesine saı belgili bir qashyqtyqty sýda júzip ótti. Býrabaı kýrortynda týrızmmen birge, buqaralyq sport ta damyp keledi. Óńirde salaýatty ómir saltyn ustanatyndardyń da sany artyp otyrǵanyn baıqaýǵa bolady. Búgingi jarysqa qatysýshylardyń arasynda Býrabaıǵa alǵash ret kelgender de bar», - dep atap ótti «Býrabaı damý» JShS Bas dırektorynyń orynbasary Shyńǵys Orazalın.

Tartysty ótken jarys qatysýshylar men olarǵa jankúıer bolyp kelgen kórermenderdiń kóńilinen shyqty.

«Búgingi jarys arqyly men sýda júzýdiń jańa qyryna kóz jetkizdim. Aldaǵy ýaqytta sport osy túrimen aınalysamyn dep sheshtim. Osyndaı jarystardy ótkizýge Qazaqstannyń múmkindigi jetkilikti», - dep áserimen bólisti jarysqa qatysýshy Roman Fýraev.

Jeńimpazdar 3 qashyqtyq boıynsha anyqtaldy. 1 km shaqyrym -áýesqoılar arasynda Dmıtrıı Dýdnık, 4 km shaqyrym -Býrabaı kólin bir jaǵalaýynan ekinshi jaǵalaýyna kesip ótýde Azat Ahmetov, 8 km – kóldi tolyq júzip ótip, Jumaqtas taýynan aınalyp keıin qaıtý kelýde Vladıslav Sýharev (1 saǵat 54 mınýt 55 sekýndta júzip ótti) jeńimpaz atandy. 

Aıta ketsek, budan buryn Býrabaıda júgirýden Aqbura Bay Trail-4 halyqaralyq jarysy ótkenin jazǵan edik.