Býrabaıda 43 jastaǵy turǵyn birge turatyn áıeldi uryp, qolyn syndyrǵan
BÝRABAI. QazAqparat – Aqmola oblysynyń 43 jastaǵy turǵyny birge turatyn áıeldi uryp, qolyn syndyrdy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, 2020 jylǵy qyrkúıektiń 30-da Býrabaı aýdandyq PD kezekshilik bólimine 38 jastaǵy áıeldiń óz úıinde dene jaraqatyn alyp, qoly synǵandyǵy týraly habar tústi.
«Aıtylǵan mekenjaıǵa jetken tártip saqshylary zardap shekken áıeldiń bolǵan jaǵdaıdy jasyryp qalý úshin aýrýhanaǵa barmaǵandyǵyn anyqtady. Belgili bolǵandaı, 43 jastaǵy er adam birge turatyn áıelmen qosylyp araq ishken, keıin ekeýara shyqqan janjal barysynda áıeldi kóseýmen uryp, qolyn syndyrǵan», - deıdi vedomstvodan.
Qazirgi kezde, er adamnyń ústinen QR QK 107-baby boıynsha sotqa deıingi tergeý amaldary júrgizilýde.
