Býrabaıda 4 eldiń úzdik jas geologtary anyqtaldy
Býrabaı kýrorttyq aımaǵyndaǵy «Baldáýren» respýblıkalyq oqý-saýyqtyrý ortalyǵynda alty kún boıy jalǵasqan jarysqa Qazaqstan, Reseı, Qyrǵyzstan jáne Ózbekstan elderinen kelgen komandalar qatysyp, baq synady.
Olımpıada jeńimpazdary geologııalyq tilmeler men kartalardy qurý, marshrýttar salý, mınerologııa jáne petrografııa negizderinen bilim saıystary boıynsha anyqtaldy.
Jeńimpazdardy quttyqtaý rásimine QR IDM vıtse-mınıstri Tımýr Toqtabaev pen QR IDM Geologııa jáne jer qoınaýyn paıdalaný komıtetiniń tóraǵasy Aqbatyr Nadyrbaev qatysyp, sóz sóıledi.
«Komandalar arasynda óskemendik «34 karata» birinshi, almatylyq «Geolıs» ekinshi jáne astanalyq «Altaır» komandasy úshinshi orynnan kórindi.
Al, kókshetaýlyq «Sınegore» komandasy segizinshi orynǵa turaqtady. Bul komanda osyndaı jarysqa ekinshi ret qatysyp otyr. Sondyqtan, bul joly tájirıbesi jetinkiremedi.
Jekeleı esepte Reseıdiń Kemerovo qalasynan kelgen «Kýzbass» komandasy birinshi, Qazan qalasynan kelgen «GeoBars» ekinshi jáne Qyrǵyzstan astanasy Bishkek qalasynyń «Strannık» komandasy úshinshi orynǵa laıyq dep tanyldy.
Aıta ketý kerek, 2010 jyly jas geologtardyń 1-shi Qazaqstandyq ashyq dalalyq olımpıadasyna barlyǵy 8 komanda qatysqan bolatyn. Bul jolǵy olımpıadaǵa barlyǵy 20 komanda qatysyp, baq synady. Onyń ishinde Reseı Federatsııasynan - 2, Qyrǵyz Respýblıkasynan - 2, Ózbekstannan - 1 komanda jáne Qazaqstannan 15 komanda. Jyl ótken saıyn jas geologtardyń tek komanda sany ǵana emes, olardyń daıyndyq deńgeıi de ósip keledi.
