Býrabaıda 200 balanyń qatysýymen Prezıdent shyrshasy ótti
KÓKShETAÝ. QazAqparat - Aqmola oblysynda 200 balanyń qatysýymen QR Prezıdenti shyrshasy ótti, dep habarlaıdy "QazAqparat" HAA tilshisi.
Býrabaıdaǵy «Rixos Borovoe» qonaq úı kesheninde «Jańa jyldyq alaýlar EKSPO-2017» taqyrybymen uıymdastyrylǵan shyrshaǵa oblystaǵy 17 aýdan men 2 qala, balalar úıinen, 4 oblystyq arnaıy túzetý mektep-ınternattarynan, 3 daryndy balalarǵa arnalǵan oblystyq arnaıy mektep-ınternattarynan, jasóspirimderdi ońaltý jáne áleýmettik beıimdeý oblystyq ortalyǵynan, múgedek balalardy qoldaý qaýymdastyǵynyń oqý úzdikteri, jetim balalar jáne ata-anasynyń qamqorlyǵynsyz qalǵan balalar, múgedek balalar, az qamtylǵan jáne kóp balaly otbasylardyń 9 jastan 13 jas aralyǵyndaǵy 200-ge jýyq bala qatysty.
Merekelik shyrsha barysynda «Dostyqtaǵy kúsh jáne balalardyń birligi» atty jańajyldyq teatrlanǵan kórinis qoıyldy. Eń bastysy Qazaqstan Respýblıkasynyń Prezıdenti N.Á.Nazarbaev shyrshaǵa jınalǵan balalarǵa beıne quttyqtaýyn joldady. Sonymen qatar, sharaǵa Aqmola oblysynyń ákimi S.V.Kýlagın qatysyp, quttyqtaý sóz sóıledi 
"Sizderdiń barlyǵyńyz talanttysyzdar. Sizderge Elbasy zor senim artyp otyr. Sondyqtan, oqýlaryńyzdy jaqsy oqyńyzdar", dedi oblys ákimi óz sózinde.
Osylaısha, Jańa jyldyq shyrshanyń ertegilik kórinisi tátti ústelmen jáne eskertkish syılyqtaryn tapsyrýmen aıaqtalady.
Eske sala keteıik, Prezıdent shyrshasyna qatysatyn balalar úshin 25 jeltoqsan kúni «Laplandııa» Aıaz Atanyń rezıdentsııasyna saıahaty jáne oıyn-saýyq baǵdarlamasy uıymdastyryldy. Al, keshkisin balalar «Baldaýren» respýblıkalyq oqý-saýyqtyrý ortalyǵynda mádenı sharalardy tamashalady.
