Býrabaı jartastaryndaǵy shımaı-shatpaq jazý óshirilip jatyr
ASTANA. KAZINFORM - «Býrabaı» memlekettik ulttyq tabıǵı parkiniń ujymy vandaldardyń jartastarda qaldyrǵan jazýlary men sýretterin tazartýdy bastady.
«Qazirgi tańda Býrabaı kóliniń jaǵasyndaǵy barlyq jartastarda, sondaı-aq Jumbaqtasta kelýshilerdiń «qoltańbasy» qalǵan. Boıaýlardyń kóbi birneshe qabattan turady, qalyńdyǵy 1 sm-ge deıin jetedi, óshirý qıyn. Sarapshylardyń pikirinshe, taý-tastardy tolyq tazalap shyǵýǵa bir jyl ýaqyt ketedi deıdi. Jartastarǵa jazý jazyp, graffıtı salý bul naǵyz vandalızm ekenin túsindirý kerek. Vandaldardyń áreketi Ulttyq parktiń tabıǵı landshaftynyń kelbetin buzady, sondaı-aq taý-tastarǵa orny tolmas zııan keltiredi. Jartasqa boıaý jaǵýǵa birneshe sekýnd jetkilikti, al tazartý úshin kóptegen saǵat jumys isteýge týra keledi. 10 sharshy santımetrlik bir áripti óshirý úshin jaǵylǵan boıaýdyń quramy men qalyńdyǵyna baılanysty 30-50 mınýt qajet. Ulttyq parkte adamdardyń qashaý nemese basqa da quraldardy qoldanyp jazýlardy óz betinshe qolmen óshirýine tyıym salynǵanyn atap ótken jón. Sebebi bul tastyń betki qabatyn juqartyp, buzylýyna ákep soǵýy múmkin. Sondaı-aq, ártúrli boıaý eritkishter qorshaǵan ortaǵa, ásirese kóldiń bıoalýandyǵyna teris áser etedi», — deıdi «Býrabaı» MUTP ormanshysy Qaıyrbaı Baltabaev.
Jartastardy tazartý úshin Ulttyq park qorshaǵan ortaǵa zııany az, qurǵaq aǵyndy vakýýmdy óńdeý arqyly jartastardy tazartatyn arnaıy qural satyp alǵan.
«Bul jumsaq ári ekologııalyq tazartý ádisiniń taý jynystarynyń betki qabatyna áseri az. „Býrabaı“ MUTP qoldanatyn tehnologııada joǵary qysymsyz, az abrazıvti bolyp sanalady. Jańa tehnologııa vakýým men arnaıy túıirshikterdi qoldanýǵa negizdelgen. Tastyń beti germetıkalyq túrde bekitilgen reaktıvti sorǵysh arqyly tazartylady. Dál ári jyldam baǵyttalatyn abrazıv tastyń betin zaqymdamaıdy, kir men boıaýdy ǵana ketiredi», — dep túsindirdi «Býrabaı» MUTP ınjener-ekologi Marjan Abdrahmanova.
«Ekologııalyq vahtany» birinshi bolyp Býrabaı orman sharýashylyǵynyń ınspektorlary bastap otyr. Olar Bólektaý, Kókshetaý, Jeke batyr taýlarynyń eń kóp lastanǵan, týrıster jıi baratyn jerlerin tazalaıdy.
«Býrabaıdyń sımvoly — Jumbaqtasty tazartý qys mezgiline, kól betine muz qatqan ýaqytta júrgiziletin boldy. Jartastardy tazartý park qyzmetkerleri úshin erekshe mańyzdy jumys bolyp otyr. Ekologııalyq bastamaǵa týrıster de atsalysady degen úmit bar. Biz Ulttyq park qonaqtarynan tabıǵat aıasynda demalýǵa jaýapkershilikpen qaraýdy, qorshaǵan ortany aıalaýdy, jartastaǵy vandalızmge jol bermeýdi, mundaı oqıǵa týraly bizge habarlaýdy suraımyz. Sulý tabıǵatty saqtaý, oǵan qamqorlyqpen qaraý bárimizdiń ortaq boryshymyz», - deıdi ormanshy Qaıyrbaı Baltabaev.
