Býrabaı jaǵajaıynda aqy ne úshin tólenedi
ASTANA. QazAqparat - Aqmola oblysyndaǵy Býrabaı kýrortynda ortalyq jaǵajaıdyń basqarýshysy demalysqa kelgenderdiń shaǵymdaryna túsinik berdi, dep habarlaıdy QazAqparat.
Belgili bolǵandaı, jaǵajaıǵa barǵan adamdar aqyly dárethananyń ornatylýyna narazylyq bildirgen.
«Demalysqa kelgender sý qoımasyn lastap júrgeni tańǵalarlyq jaǵdaı emes», - dep jazdy Feısbýkte G. Qusdáýletova esimdi paıdalanýshy.
Onyń sózine qaraǵanda, úshkúndik demalysta dárethanaǵa barǵan 10 eresek pen 5 bala 10 myń teńgege jýyq aqshasyn jumsaǵan.
«Dárethanalar bizdiń menshik emes, olardy jalǵa alamyz. Sonymen qatar ondaǵy tazalyqty qamtamasyz etý úshin tıisti shyǵyndar bar ekendigi belgili, sebebi ol jerge ortalyq káriz júıesi tartylmaǵan. ıAǵnı kúnine eki márte, al adamdar kóp kelgende úsh retten tazartamyz. Kólikti shaqyrtyp, bir ret tazartýǵa 3,5 myń teńge tólenedi. Oǵan qosa, kúni boıy dárethananyń tazalyǵyn tártipke keltirýshi adamnyń bólek eńbekaqysy bar»,-deıdi jaǵajaıdy basqarýshy Jandos Baıgenjınov.
Aıta keteıik, eresekter úshin jaǵajaı aýmaǵyna kirý quny 1000 teńge bolsa, 3-ten 12 jasqa deıingi balalar men zeınetkerler úshin 500 teńgeden tólenedi. Úsh jasqa deıingi balalar úshin jaǵajaı aýmaǵyna barý - tegin.
Bul baǵalar sońǵy úsh jylda saqtalyp tur. Kirý úshin bir ret jasalǵan tólem arqyly kúni boıy jaǵajaıdaǵy aǵash jataqtar men oryndyqtardy tegin paıdalanýǵa bolady.
«Іshte ornalasqan attraktsıondar balalar úshin aqysyz ekenin adamdar eskermeıdi, ıaǵnı osyndaǵy batýt, syrǵanaýǵa arnalǵan tóbeshikter jasaqtalyp, katamarany bar balalar basseıni qoıylǵan»,-dedi Baıgenjınov.
