Býrabaı ulttyq parkinde jyl saıyn 65 gektar alqapqa aǵash otyrǵyzylady

ASTANA. QazAqparat – «Býrabaı» memlekettik ulttyq tabıǵı parki aýmaǵyna jyl saıyn 65 gektar alqapqa aǵash otyrǵyzylady. Bul jaıynda park ormanshysy Qaıyrbaı Baltabaev aıtty, dep habarlaıdy QazAqparat tilshisi.

«Negizinde aǵashtardy órtten keıingi aýmaqqa, aýrý aǵashtardy otaǵan jerlerge otyrǵyzamyz. ıAǵnı, ormandy qalpyna keltiremiz. Jyl saıyn tabıǵı park aýmaǵyndaǵy 65 gektar alqapqa qaraǵaı, qaıyń egemiz. Ormandardy jaılastyrý materıaldaryna saı jumys júrgizemiz. On jylǵa arnalǵan josparymyz bar. Onda qandaı alqapqa aǵashtyń qaı túrin jáne nesheýin egý qajettigi anyq kórsetilgen», - dedi Qaıyrbaı Baltabaev parktiń órtke qarsy is-sharalarymen tanysý úshin kelgen BAQ ókilderine bergen suhbatynda.

Ormanshynyń dereginshe, egilgen aǵashtardyń 70 paıyzy jersinip, jaıqalyp ósedi.

«Qazirgi ýaqytta kúzgi túgendeý júrgizilip jatyr. Kóktemde otyrǵyzylǵan aǵashtardyń nesheýi jersingeni esepteledi. Sodan keıin kelesi jyly taǵy qansha aǵashty qosymsha otyrǵyzý qajettigi anyqtalady. Josparymyzǵa sáıkes, bir gektar jerge 8 myń túp aǵash otyrǵyzylady», -dedi ol.

Sonymen qatar Qaıyrbaı Baltabaev qaraǵaıdan tuqym men kóshet alý protsesiniń tehnologııasyn túsindirip ótti.

«Tehnologııaǵa sáıkes, aldymen qaraǵaı búrshigin jınaımyz. Odan keıin ony óńdeýge jiberip, tuqym alamyz. Sol tuqymdy ózimizdiń tálimbaqta eki jyl ósirip, kóktemde park aýmaǵyndaǵy aldyn ala belgilengen jerge otyrǵyzamyz», - dedi ormanshy.

Aıta keteıik, QR Prezıdenti Іs basqarmasyna qaraıtyn «Býrabaı» memlekettik ulttyq tabıǵı park aýmaǵy 129 myń gektardan astam jerdi alyp jatyr.