«Býrabaı» ulttyq parki aýmaǵynda pıknıkke arnalǵan 35 jańa oryn jabdyqtaldy

ASTANA. QazAqparat – Týrıstik maýsym qarsańynda «Býrabaı» ulttyq parkiniń aýmaǵynda pıknıkke arnalǵan 35 jańa oryn jabdyqtaldy, dep habarlaıdy QazAqparat Prezıdent Іs basqarmasynyń baspasóz bólimine silteme jasap.

«Býrabaı» kýrortynyń aýmaǵynda as pisiretin oshaǵy bar alańdary, ústelderi men oryndyqtary, qaýipsiz ot jaǵýǵa arnalǵan barbekıý aımaǵy bar 26 pıknık aımaǵyn jáne ot jaǵatyn oryn qarastyrylmaǵan 9 jańa qosymsha oryndy jaılastyrý jumysy aıaqtaldy.

Maqsat – álemdik tájirıbege súıene otyryp, ulttyq parkte órkenıetti demalysty uıymdastyrýǵa júıeli, oılastyrylǵan túrde jaqyndaý.

Foto: Prezıdent Іs basqarmasynyń baspasóz bólimi

Aıta ketý kerek, ormandaǵy órt qaýipsizdigin Smart National Park Burabay júıesi baqylaıdy. Ol ulttyq saıabaqtyń búkil aýmaǵyn – 129 myń gektardan astam jerdi alyp jatqan qoryqty «kóredi». «Aqyldy» júıeniń prıntsıpi medıtsınalyq tomografqa uqsaıdy: kamera sheńber boıymen qozǵalyp, ár aınalymda kóptegen fotosýret túsiredi. Sodan soń qaýipti jerlerdi qyzyl kontýrmen belgilep, jedel basqarý ortalyǵynyń pýltine sıgnal jiberedi.

Jańa demalys oryndary Úlken Shabaqty, Kishi Shabaqty kólderiniń jaǵasynda, sondaı-aq «Terrasa park» qonaqúıinen «Aqbýra» kýrortyna deıin sozylyp jatqan velosıped jolynyń boıynda ornalasqan. Ot jaǵýǵa bolmaıtyn, tek at shaldyrýǵa arnalǵan jerler «Aıqulaq» músininen bastap «Abylaı han alańyna» deıingi velojoldyń boıynda, «Kenesary úńgirine» jaqyn mańda jabdyqtalǵan.

Naqty aqparat kartada kórsetilgen. Tańdalǵan aımaqqa barý úshin QR kodty skanerleý kerek.