Býrabaı ulttyq tabıǵı parki aýmaǵynan qalaı tez ári yńǵaıly shyǵýǵa bolady
ASTANA. KAZINFORM – «Býrabaı» memlekettik ulttyq tabıǵı parki jyl saıyn bir mıllıonnan astam kelýshini qabyldaıdy. Maýsym qyzǵan kezde avtokólik aǵyny birneshe ese artyp, Býrabaı kentindegi ekinshi baqylaý-ótkizý pýnktinde kezek paıda bolýy múmkin.
Bul júıedegi aqaý nemese kirýge shekteý emes, eldegi eń tanymal týrıstik baǵyttardyń birine degen joǵary suranystyń nátıjesi.
Osyǵan baılanysty kelýshilerge ýaqytty únemdeý jáne BÓP-2 júktemesin azaıtý úshin shyǵý baǵytyn aldyn ala josparlaý usynylady.
«Park ákimshiligi kelýshilerden júktemeni eskerip, shyǵý baǵytyn aldyn ala tańdaýdy suraıdy. Aýmaqtan kútýsiz ári jyldam shyǵýǵa múmkindik beretin birneshe balama baǵyt bar», — dedi dırektordyń orynbasary Venera Nýgmanova.
Birinshi baqylaý-ótkizý pýnkti «Astana – Kókshetaý» tasjolyna shyǵarady jáne elordaǵa nemese soltústik baǵytqa bet alǵandar úshin qolaıly. Úshinshi baqylaý-ótkizý pýnkti Şýchınsk qalasy arqyly ótedi jáne kýrorttyq aımaqtaǵy kólik aǵynyn tıimdi bólýge múmkindik beredi. Tórtinshi baqylaý-ótkizý pýnkti «Baldáýren» balalar ortalyǵy arqyly ornalasqan jáne negizgi shyǵý núktesindegi júktemeni azaıtýǵa yqpal etedi.
Atalǵan baǵyttardy paıdalaný jolǵa ketetin ýaqytty qysqartyp, ulttyq park ınfraqurylymyna túsetin salmaqty azaıtady.
Kelýshilerge qolaılylyq úshin kirý tóleminiń birneshe tásili qarastyrylǵan: Kaspi.kz jáne Halyk qosymshalary arqyly, halyqaralyq tólem júıeleriniń kartalarymen jáne qolma-qol tóleýge bolady. Bul kirý jáne shyǵý kezinde kidiristerdiń aldyn alýǵa kómektesedi.
«Býrabaı» ulttyq parki tek demalys orny ǵana emes, sonymen qatar tabıǵı tepe-teńdikti saqtaýǵa erekshe mán beriletin aýmaq bolyp qala beredi.
«Baǵytty durys tańdaý ár kelýshiniń saparyn jaıly etedi jáne búkil júıeniń artyq júktemesiz jumys isteýine múmkindik beredi», — dep atap ótti park ókilderi.
Aıta keteıik, buǵan deıin Şýche-Býrabaı kýrorttyq aımaǵyn damytýǵa 137,2 mlrd teńge jumsalatyny habarlandy.
