«Býrabaı» ulttyq parkiniń qoryqshylary sırek kezdesetin sur úkini vıdeoǵa túsirip aldy
«Býrabaı» ulttyq parkiniń qoryqshylary bul óńirde óte sırek kezdesetin úlken sur úkini beınekameraǵa túsirip aldy, dep habarlaıdy QazAqparat ulttyq parktiń Instagram paraqshasyna silteme jasap.
Onda úkiniń joıylyp bara jatqan qus retinde Halyqaralyq «Qyzyl kitapqa», Reseıdiń birqatar óńirleriniń «Qyzyl kitabyna» engeni aıtylǵan.
Tabıǵat qorǵaý ınspektory Aıbek Aqjúnis «Býrabaı» orman sharýashylyǵyn sholyp júrip, qaraǵaıdyń bıikteý butaǵynda qonyp otyrǵan úlken sur úkini baıqap qalǵan.
- Men mundaı qusty buryn-sońdy kórmegenmin. Birden telefonymdy qostym. Vıdeony ózimizdiń ornıtologtarǵa kórsetip edim, ǵalymdar sırek kezdesetin sur úki ekenin aıtty,- deıdi Aıbek Maratuly.
Ǵylymda Strix nebulosa degen atpen belgili. Ony ulttyq park aýmaǵynda osymen bar bolǵany ekinshi ret ǵylym bólimi tirkep otyr. Úlken sur úki Qazaqstanda Tarbaǵataı taýlarynda, Katonqaraǵaı bıosferalyq rezervatynda kezdesedi. Reseıdiń keı óńirlerin, Mońǵolııanyń taýly jerlerin mekendeıdi. Óz tuqymdastarynyń ishindegi eń irisi sanalatyn qus qanatyn jaıǵanda, qulashy 1 jarym metrge deıin jetedi. Erkeginiń salmaǵy shamamen 1,2-1,3 kg, urǵashysy 1 kılodaı tartady.
Posmotret etý pýblıkatsııý v Instagram
