«Býrabaı» ulttyq parkiniń qyzmetkerleri «Qyzyl kitapqa» engen aqqýdy qutqardy

«Býrabaı» memlekettik ulttyq tabıǵı parki Bulandy orman sharýashylyǵynyń qyzmetkerleri Qazaqstannyń «Qyzyl kitabyna» engen jaraly suńqyldaq aqqýdy qutqardy, dep habarlaıdy Kazinform. 

Sırek kezdesetin qusty Birjan sal aýdanynyń Makınka aýylynyń turǵyndary Nıkolaı Rýsskıh pen Álııa Esimova kórip qalǵan. Olardyń sózinshe, aqqý qanatynan jaralanǵan jáne úıdiń mańyndaǵy shalshyq sýda úı qustarymen birge júzip júrgen. Olar birden «Býrabaı» ulttyq parkine habarlasyp aıtqan.

«Balapan aqqý ekeni kórinip tur. Sol jaq qanatynyń qaýyrsyny túsip qalǵan, usha almaıdy. Álsiregen qus tobynan bólinip, jyly jaqqa kete almaı qalsa kerek», - dedi orman sheberi Arman Apahov.

Jaraly qus «Býrabaı damý» JShS haıýanattar baǵyna tapsyryldy. Qazaqstannyń «Qyzyl kitabyna» engen qus osy jerde qystap shyǵyp, kóktemge qaraı jyl qustary qaıtqan kezde erkindikke jiberiledi.

Aıta ketsek, «Býrabaı» memlekettik ulttyq saıabaǵynda qustardyń 197 túri bar. Olardyń 14-i Qyzyl kitapqa engizilgen.

Eske sala keteıik, budan buryn Býrabaı ulttyq parkinde qanaty qaıyrylyp, usha almaı qalǵan qyrǵı qutqarylǵanyn jazǵan edik.