«Býrabaı» ulttyq parkinde ýyldyryq alý úshin aq balyq tuqymdas balyqtar aýlanbaqshy
KÓKShETAÝ. KAZINFORM – «Býrabaı» MUTP 2024 jylǵy 11 qarasha men 30 jeltoqsan aralyǵynda Shortandy kólinen aqbalyq tuqymdas paıdabalyq (pelıad) jáne rıpýs (kókshubar) balyqtary kóbeıtý úshin aýlanatynyn habarlady.
Balyq aýlaýdy «Býrabaı» MUTP janýarlar dúnıesin qorǵaý jáne ósimin molaıtý bóliminiń qyzmetkerleri júzege asyrady. Olardyń ýyldyryǵy Zerendidegi balyq sharýashylyǵy kásipornynda ınkýbatsııalanyp, keıin maıshabaqtar Ulttyq park aýmaǵyndaǵy kózderdiń aıdynyna jiberiledi.
«Bul is-shara QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń „EQTA-da balyq aýlaý kólemin bekitý týraly“ 2024 jylǵy 4 shildedegi № 27-4/174 nq buıryǵy negizinde, sondaı-aq Ulttyq park úshin Balyq sharýashylyǵy QazǴZI Soltústik fılıalynyń mamandary ázirlegen bıologııalyq negizdemege sáıkes uıymdastyrylyp otyr», — delingen «Býrabaı» MUTP habarlamasynda.
Sondaı-aq, 11 qarashadan 11 jeltoqsanǵa deıin «Býrabaı» MUTP kólderinde qaýipsiz qalyń muz jamylǵysy paıda bolǵanǵa deıin sporttyq-áýesqoılyq balyq aýlaýǵa joldama satý toqtatylatyny habarlandy. Bul jazataıym oqıǵalardy boldyrmaý úshin qajet. Aýa-raıyna baılanysty balyq aýlaýǵa tyıym salý merzimi uzartylýy múmkin.
Eske sala keteıik, buǵan deıin SQO-da balyq sharýashylyǵymen aınalysatyn úsh joba júzege asatynyn jazǵan bolatynbyz.
