«Býrabaı» ulttyq parkinde týrıster úshin 45 pıknık aımaǵy qoljetimdi
KÓKShETAÝ. KAZINFORM - «Býrabaı» ulttyq parkinde týrıster úshin 45 pıknık aımaǵy qoljetimdi, onyń 10-y bıyl týrıstik maýsym aldynda ornatyldy.
«Býrabaı» MUTP baspasóz qyzmetiniń málimetinshe, pıknıkke arnalǵan nysandar Kishi Shabaqty, Úlken Shabaqty jáne Qatarkól kólderiniń jaǵasynda týrısterdiń tabıǵı demalý oryndarynda uıymdastyrylǵan. Pıknık alańdary qaýipsiz ot jaǵýǵa arnalǵan barbekıýmen, ýrnamen, oryndyqtary bar aǵash ústelmen jabdyqtalǵan.
«Ulttyq park aýmaǵynda demalysty retke keltirý úshin ótken jyly biz 35 pıknık aımaǵyn jabdyqtadyq. Olardyń 26 qaýipsiz ot jaǵýǵa jáne kebab pisirýge arnalǵan aımaqtar, al 9 oryn mangalsyz. Bıyl taǵy on pıknık aımaǵyn qostyq. Onyń ekeýi Qatarkól aýylynyń mańynda, úsheýi Kishi Shabaqty kóliniń jaǵasynda jáne beseýi Úlken Shabaqty kóliniń jaǵasynda ornalasqan. Osynyń barlyǵyn demalýshylardyń ot jaǵyp, qoqysty shashyp tastamaýy úshin jasap otyrmyz», - dedi «Býrabaı» MUTP dırektory Sergeı Bykov.
Barlyq pıknık alańdary demalýshylar úshin tegin. Demalys oryndarynyń janynda 500 kólikke arnalǵan 7 avtoturaq alańy qarastyrylǵan.
«Kóbinese demalýshylar kólikterdi tikeleı ormanǵa kirgizedi nemese kólikti jol jıegine laqtyrady. Biz orman alqabyna júktemeni azaıtqymyz keledi. Sondyqtan kólderdiń boıynda, týrıster jaqsy kóretin «jabaıy» demalys oryndarynda ınfraqurylym quryp, abattandyramyz», – dep qosty ulttyq park basshysy.
Jańa demalys oryndarynda gıgıena jáne órt qaýipsizdigi sharalaryn saqtaý qajettiligi týraly nusqaýlar ornalastyrylǵan.
Eske salaıyq, Býrabaı jartastaryndaǵy shımaı-shatpaq jazý óshirilip jatyr.
