Býrabaı ulttyq parkinde órt shyqty
ASTANA. KAZINFORM – Aqmola oblysyndaǵy «Býrabaı» memlekettik ulttyq tabıǵı parkiniń aýmaǵynda orman órti shyqty. Tilsiz jaý jedel oqshaýlanyp, tolyq sóndirildi, dep habarlaıdy Ekologııa jáne tabıǵı resýrstar mınıstrligi.
Mınıstrliktiń málimetinshe, 11 qazanda Qazaqstan boıynsha bir orman órti tirkelgen. Órt Aqmola oblysyndaǵy «Býrabaı» memlekettik ulttyq tabıǵı parkiniń aýmaǵynda bolǵan.
Órt daladaǵy jalynnyń memlekettik orman qory jerlerine taralýy saldarynan shyqqan.
Ony sóndirýge memlekettik orman mekemeleriniń kúshteri men quraldary, sondaı-aq «Qazavıaormanqorǵaý» respýblıkalyq memlekettik qazynalyq kásipornynyń áýe desanttary jumyldyryldy.
– Órt oshaǵy anyqtalǵan sátten bastap jedel habarlaý júıesi arqyly qajetti kúshter men quraldar oqıǵa ornyna ýaqytyly jetkizildi. Sonyń nátıjesinde órt qysqa merzimde oqshaýlanyp, tolyq sóndirildi, – dep habarlady mınıstrlik.
Vedomstvo órt qaýpi joǵary kezeń áli aıaqtalmaǵanyn eskertip, azamattardy tabıǵat aıasynda órt qaýipsizdigi talaptaryn qatań saqtaýǵa shaqyrdy.
Aıta keteıik, buǵan deıin de Býrabaı ulttyq parkinde naızaǵaı túsýi saldarynan orman órti shyqqan bolatyn. Órt oshaǵy erte anyqtaý júıesiniń kómegimen der kezinde anyqtalyp, sóndirilgen.
