«Býrabaı» ulttyq parkinde memlekettik ınspektorlardyń jumysy qalaı qamtamasyz etiledi
ASTANA. KAZINFORM - «Býrabaı» memlekettik ulttyq tabıǵı parkiniń (MUTP) shamamen 130 myń gektar aýmaǵyn qorǵaý úshin bilikti mamandar ǵana emes, sonymen qatar olardyń táýlik boıy qorǵalatyn aýmaqta qyzmet atqarýyna múmkindik beretin damyǵan ınfraqurylym qajet. Osy maqsatta ulttyq park aýmaǵynda 27 kordon jumys isteıdi.
Kordondar – memlekettik ınspektorlardyń tolyqqandy jumys bazasy. Munda táýlik boıy kezekshilik uıymdastyrylady, jedel keńester ótkiziledi, patrýldeý baǵyttary belgilenedi, jedel radıobaılanys qamtamasyz etiledi, reıdterdiń qorytyndy materıaldary men qyzmettik qujattar rásimdeledi. Sonymen qatar, kordondar eldi mekenderden shalǵaıda qyzmet atqaratyn qyzmetkerlerdiń turýyna qajetti jaǵdaı jasaıdy.
– Bul tek qyzmetkerlerge arnalǵan turǵyn úı nemese ormandaǵy qarapaıym úıshikter emes. Kordondar – erekshe qorǵalatyn tabıǵı aýmaqty, memlekettik orman qoryn, janýarlar men ósimdikter dúnıesin qorǵaý júıesiniń mańyzdy bóligi, – deıdi «Býrabaı» MUTP Ormandardy jáne ósimdikter dúnıesin qorǵaý, molyqtyrý jáne utymdy paıdalaný bóliminiń basshysy Mereke Júnisov.
Inspektorlardyń tikeleı ormanshylyqtar aýmaǵynda ornalasýy patrýldeý ýchaskelerine deıingi qashyqtyqty qysqartyp, kelip túsken habarlamalarǵa jedel áreket etýge múmkindik beredi. Bul ásirese órt qaýpi joǵary kezeńde mańyzdy, óıtkeni órttiń erte anyqtalýy men oqıǵa ornyna der kezinde jetý órtti bastapqy kezeńde oqshaýlaýǵa múmkindik beredi.
Segiz kordon aýmaǵynda qosymsha birinshi úlgidegi orman órt sóndirý stantsııalary (LPS-1) ornalasqan. Osylaısha, orman alqaptarynyń ishinde memlekettik ınspektorlarmen qatar, órtke alǵashqylardyń biri bolyp áreket etýge qajetti kúshter men quraldar da shoǵyrlanǵan.
Sonymen qatar, «Býrabaı» MUTP tabıǵat qorǵaý qyzmetiniń ınfraqurylymyn kezeń-kezeńimen jańartyp keledi. Biraz jyl buryn salynǵan eski kordondardyń ornyna táýlik boıy jumys isteýge jáne qyzmetkerlerdiń turýyna qajetti ınjenerlik kommýnıkatsııalarmen jabdyqtalǵan zamanaýı ǵımarattar boı kóterip jatyr.
2019 jyly ulttyq park aýmaǵynda úsh jańa kordon salyndy. 2023 jyly taǵy bir kordon paıdalanýǵa berilse, 2025 jyly birden bes jańa nysan iske qosyldy. Osy kezeńde barlyǵy toǵyz kordon jańartyldy. Qazirgi ýaqytta Jalaıyr ormanshylyǵynda taǵy bir jańa kordonnyń qurylysy jalǵasyp jatyr.
Jańa nysandarda tolyqqandy jumys kabınetteri, kezekshilik jáne demalys bólmeleri, sýmen jabdyqtaý jáne sý burý júıeleri, sondaı-aq turmysqa qajetti barlyq jaǵdaı qarastyrylǵan. Orman qory aýmaǵynda qyzmetiniń basym bóligin ótkizetin ınspektor úshin mundaı ınfraqurylym kúndelikti qyzmettik qamtamasyz etýdiń mańyzdy bóligi sanalady.
Búginde kordon birneshe mańyzdy mindetti qatar atqarady: ol – ınspektordyń jumys bazasy, táýlik boıǵy kezekshilik pen baılanys pýnkti, patrýldeý baǵyttarynyń bastaý núktesi, órtke qarsy ınfraqurylymnyń elementi jáne qyzmettik turǵyn úı.
Kordondardy kezeń-kezeńimen jańartý «Býrabaı» MUTP-ǵa memlekettik ınspektorlardyń eńbek jaǵdaıyn jaqsartýmen qatar, ulttyq park aýmaǵyn qorǵaý ınfraqurylymyn nyǵaıtýǵa múmkindik beredi. Árbir osyndaı nysannyń basty maqsaty – Býrabaıdyń ormandary, janýarlar jáne ósimdikter dúnıesi qorǵalatyn aýmaqtarda mamandardyń turaqty túrde qyzmet atqarýyn qamtamasyz etý.
