Býrabaı turǵynynyń ıtterge atqan oǵy áriptesine tıdi

KÓKShETAÝ. KAZINFORM — Býrabaıda aıaǵynan oq tıgen er adam aýrýhanaǵa jetkizildi.

Belgili bolǵandaı, Býrabaıdaǵy kásiporyndardyń biriniń qyzmetkeri qańǵybas ıtterge oq atpaq bolyp, abaısyzda áriptesiniń aıaǵyna tıgizip alǵan.

Aqmola oblysy ákimdiginiń densaýlyq saqtaý basqarmasy baspasóz qyzmetiniń habarlaýynsha, er adam aýrýhanaǵa atys qarýynan alǵan jaraqatymen jetkizilgen.

— Naýqastyń ómiri men densaýlyǵyna tónip turǵan qaýip joq. Jaǵdaıy turaqty, Býrabaı aýdandyq aýrýhanasyna jatqyzyldy, — delingen basqarma málimdemesinde.

Al Aqmola oblystyq polıtsııa departamentiniń baspasóz qyzmeti adamnyń densaýlyǵyna abaısyzda aýyr zııan keltirý jáne janýarlarǵa qatygezdik tanytý faktileri boıynsha sotqa deıingi tergep-tekserý bastalǵanyn habarlady. Qazirgi ýaqytta qajetti tergeý sharalary júrgizilip jatyr.

Sondaı-aq polıtseıler qoldanylǵan qarýdy tekserýge aldy.

Eske sala ketsek, Іshki ister mınıstriniń orynbasary Igor Lepeha Jańaózende dárigerdiń ólimine qatysty is boıynsha pikir bildirdi.