Býrabaı sport mektebinde ishek ınfektsııasy anyqtalǵan balalardyń jaǵdaıy qalaı

ASTANA. KAZINFORM — Búginde oblystyq kópsalaly balalar aýrýhanasy men «Avıtsenna-Býrabaı» JShS-da jatqan barlyq balalar aýrýhanadan shyqty, olardy ata-analary alyp ketti. 

Oblystyq kópsalaly balalar aýrýhanasynyń dırektory Muhtar Doshojınniń aıtýynsha, olarǵa tórt bala jiberildi, biraq keshe olardyń barlyǵy aýrýhanadan shyqty. 

— Balalardy ata-analary alyp ketti. Olar Almaty men Qostanaıdan boldy. Balalardyń barlyǵy aýrýhanadan shyǵaryldy, olar túsken kezde de jaǵdaıy qanaǵattanarlyq boldy. Keshe olar eshbir sımptomsyz, dene qyzýy kóterilmeı áketildi. Biz taldaý júrgizdik, biraq qorytyndysy áli shyqqan joq, sondyqtan aýrýdyń sebebin aıta almaımyz. Taldaý qorytyndysy 3-4 kúnde daıyn bolady, — dep túsindirdi bas dáriger.

Aqmola oblystyq densaýlyq saqtaý basqarmasynyń baspasóz qyzmeti habarlaǵandaı, taǵy alty bala «Avıtsenna-Býrabaı» JShS-da bolǵan. Olardyń barlyǵyn ata-analary alyp ketti. Balalardyń jaǵdaıy qanaǵattanarlyq.

Osy arada oblystyq polıtsııa departamentiniń baspasóz qyzmeti Býrabaı aýdanyndaǵy «№ 2 Jaqsy» sport mektebinde balalardyń jappaı ýlanýyna qatysty QR Qylmystyq kodeksi 304-babynyń 1-bólimi (sanıtarııalyq erejelerdi nemese gıgıenalyq normatıvterdi buzý) boıynsha qylmystyq is qozǵalǵanyn habarlady. Qazirgi ýaqytta qajetti tergeý amaldary júrgizilip jatyr. Atalǵan qylmystyq istiń tergelýi departament basshylyǵynyń baqylaýynda.

Buǵan deıin Aqmoladaǵy sport mektebinde 18 balada ishek ınfektsııasy anyqtalǵanyn jazǵan bolatynbyz.