Býrabaıdaǵy orman aýmaǵyn qorshap, qurylys salmaq bolǵan
ASTANA. KAZINFORM — Býrabaı aýdanynyń turǵyndary «Şýchınskıı» shıpajaıy mańyndaǵy ormannyń qorshalýyna narazylyq bildirdi. Olardyń aıtýynsha, bul aýmaqta qurylys salý josparlanǵan.
Áleýmettik jelide taraǵan vıdeoda jergilikti turǵyndar shıpajaı mańyndaǵy orman alqabynyń qorshaýmen qorshalǵanyn kórsetken.
— Kadrlardan orman aýmaǵynyń barǵan saıyn qorshaýlarmen qorshalyp jatqanyn kórýge bolady. Turǵyndardyń aıtýynsha, bul jerde qurylys salý josparlanǵan. Sonda aqyr sońynda ormanymyzdan ne qalady? — delingen vıdeodaǵy jazbada.
Býrabaı aýdanynyń ákimdigi málimetinshe, bıyl 28 qazanda ákimdik uıymdastyrǵan komıssııa «Şýchınskıı» shıpajaıy mańyndaǵy jer ýchaskesine baryp, qorshaý ornatylýy men josparlanǵan qurylys máselesin teksergen.
— Tekserý barysynda jer ýchaskesiniń ıgerilmegeni, qorshaý ornatý jumystary júrgizilip jatqany anyqtaldy. Sonymen qatar nysan qurylysyna qajetti ruqsat qujattary joq, — dep túsindirdi aýdan ákimdigi.
Sheneýnikterdiń habarlaýynsha, osy derekke qatysty materıaldar Aqmola oblysynyń jer resýrstaryn basqarý departamentine joldanady. Departament máseleni óz quzyreti boıynsha qarap, qoldanystaǵy zańnamaǵa sáıkes tıisti sharalar qabyldaıdy.
Eske salaıyq, munyń aldynda Aqtaýda Kaspıı teńiziniń jaǵalaýynan kommertsııalyq maqsatta berilgen 5,9 gektar jer sot sheshimimen memleket menshigine qaıtarylǵanyn habarlaǵanbyz.
