Býrabaı ormanynda naızaǵaıdan órt shyqty
ASTANA. KAZINFORM – Býrabaı ulttyq parkinde naızaǵaı túsýinen bolǵan orman órti «Smart» erte anyqtaý júıesiniń kómegimen der kezinde anyqtalyp, jedel túrde sóndirildi.
Ekologııa jáne tabıǵı resýrstar mınıstrliginiń málimetinshe, 17 maýsym kúni saǵat 10:43-te «Býrabaı» memlekettik ulttyq tabıǵı parkiniń Býrabaı ormanshylyǵy aýmaǵyndaǵy 96-oramnyń 47-teliminde aǵashqa naızaǵaı túsýinen órt shyqqan.
«Smart» orman órtterin erte anyqtaý júıesi órt oshaǵyn birden tirkep, mamandardyń jedel áreket etýine múmkindik berdi. Sonyń arqasynda jalynnyń úlken aýmaqqa taralýyna jol berilmedi.
«Órt ormanmen kómkerilgen aýmaqtyń nebári 0,001 gektaryn qamtydy. Órtti sóndirýge “Býrabaı” ulttyq tabıǵı parkiniń jáne “QazAvıaOrmanQorǵaý” kásipornynyń kúshteri jumyldyryldy. Jalpy sany 20 maman men 5 tehnıka birligi tartyldy. Onyń ishinde órt sóndirý kólikteri, shaǵyn orman-patrýldik keshen jáne jaǵdaıdy áýeden baqylaýǵa arnalǵan tikushaq boldy», – dep habarlady mınıstrlik.
Órt saǵat 11:15-te sóndirile bastalyp, 11:39-da tolyq oqshaýlanǵan.
Mamandardyń aıtýynsha, órt oshaǵy kól deńgeıinen shamamen 300 metr bıiktiktegi jartasty ári jetýi qıyn aýmaqta ornalasqan. Soǵan qaramastan qyzmetterdiń úılesimdi jumysynyń arqasynda órttiń taralýyna jol berilmedi.
Qazir oqıǵa ornynda órt saldaryn tolyq joıý jumystary júrgizilip jatyr. Ulttyq parkke keltirilgen zalal kólemi aldaǵy 15 kún ishinde anyqtalady.
Aıta keteıik, bıyl memlekettik orman qorynda 0,41 gektar aýmaqty qamtyǵan 3 órt tirkeldi.
