Býrabaı men Syǵanaqqa arnalǵan jańa monetalar aınalymǵa shyǵady
ASTANA. KAZINFORM — Ulttyq bank «Qazaqstannyń injý-marjandary» serııasynan — «BURABAY», «Qazaqstannyń ejelgi qalalary» serııasynan — «SYǴANAQ» jáne «Este qalatyn oqıǵalar men birtýar adamdar» serııasynan — «TMD 35 jyl» kollektsııalyq monetalaryn aınalysqa shyǵarady.
Kollektsııalyq monetalar 2026 jylǵy 20 shildeden bastap QUB ınternet-dúkeni arqyly satylady.
Býrabaı — qaraǵaıly ný orman, káýsar kólder men alyp granıt jartastardyń aıasynda ornalasqan Qazaqstannyń eń kórikti tabıǵı aımaqtarynyń biri. Ólke óziniń biregeı tabıǵı landshaftymen, shıpaly taza aýasymen jáne Oqjetpes pen Jumbaqtas syndy kórnekti nysandarymen daralanady. Tańǵajaıyp tabıǵaty, baı tarıhı-mádenı mańyzy men kóne ańyzdary ózara úılesim tapqan Býrabaı — elimizdiń basty tabıǵı kórikti jerleriniń biri retinde baǵalanyp, eń tanymal týrıstik mekenge aınaldy.
«BURABAY» monetasy túrli-tústi baspa jáne ınterferentsııalyq qubylmaly qabat qoldaný tehnologııasymen 925 synamdy kúmisten daıyndalǵan. Salmaǵy — 31,1 gramm, ólshemi — 45×30 mm, daıyndaý sapasy — «rroof». Nomınaly 1 000 teńgelik týyndy 2 000 (eki myń) dana taralymmen shyǵaryldy.
Syǵanaq — qazirgi Qazaqstan aýmaǵynda ornalasqan, Uly dala tarıhyndaǵy eń iri ári aıbyndy ortaǵasyrlyq shaharlardyń biri. XIII–XV ǵasyrlarda bul qala Uly Jibek jolynyń toǵysqan torabynda turyp, aımaqtyń basty saýda, qolóner jáne mádenıet oshaǵyna aınaldy. Búginde Syǵanaq qalashyǵy — Qazaqstannyń eń qundy arheologııalyq qazynalarynyń biri ǵana emes, sonymen birge babalar negizin qalaǵan ortaǵasyrlyq qala mádenıetiniń órkendeý úlgisin pash etetin uly tarıhtyń tiri kýási.
«SYǴANAQ» monetasy altyn jalatylyp, 925 synamdy kúmisten daıyndalǵan. Salmaǵy — 24 gramm, dıametri — 37 mm, daıyndaý sapasy — «rroof». Nomınaly 1 000 teńgelik týyndy 1 000 (bir myń) dana taralymmen shyǵaryldy.
2026 jylǵy 8 jeltoqsanda Táýelsiz Memleketter Dostastyǵynyń (TMD) qurylǵanyna 35 jyl tolady. TMD — irgesi 1991 jyly qalanǵan, burynǵy KSRO quramynda bolǵan birneshe memlekettiń ózara yqpaldastyǵyn arttyrýdy kózdeıtin aımaqtyq halyqaralyq uıym. Osy jyldar ishinde dostastyq aıasynda múshe memleketter ekonomıka, gýmanıtarlyq baılanys, mádenıet jáne quqyq salasynda tyǵyz seriktestik ornatyp, memleketaralyq mańyzy bar túıtkildi máselelerdi ózara úılestirip keledi. Uıym qyzmeti memleketterdiń derbes teńdigi men táýelsizdigin qurmetteý qaǵıdattaryna súıenedi.
Moneta túrli-tústi baspa qoldaný tehnologııasymen 925 synamdy kúmisten daıyndalǵan. Salmaǵy — 31,1 gramm, dıametri — 38,61 mm, daıyndaý sapasy — «rroof». Nomınaly 1 000 teńgelik týyndy 1 000 (bir myń) dana taralymmen shyǵaryldy.
Kollektsııalyq monetalar Qazaqstan Respýblıkasynyń búkil aýmaǵynda ózderiniń belgilengen qunyna saı tólemniń barlyq túri boıynsha qabyldaýǵa, sondaı-aq eldegi barlyq banktiń bank shottaryna esepke alýǵa, aýdarýǵa, usaqtaýǵa jáne aıyrbastaýǵa jatady.
Kollektsııalyq monetalar Qazaqstan teńge saraıynda daıyndaldy.
