Býrabaı memlekettik ulttyq tabıǵı saıabaǵynda 32 myń qaraǵaı kósheti egildi
ASTANA. KAZINFORM – Búgin «Taza Qazaqstan» respýblıkalyq ekologııalyq aktsııasy aıasynda Býrabaı memlekettik ulttyq tabıǵı saıabaǵynda 4,07 gektar aýmaqqa 32 myń qaraǵaı kósheti otyrǵyzyldy.
Atalǵan naýqanǵa «Býrabaı» ulttyq parki, «Oqjetpes» shıpajaıy, «Býrabaı Damý» JShS jáne «Qarasý» ShJQ RMK ujymdary qatysty.
– Mundaı birlesken ekologııalyq aktsııalar óskeleń urpaqqa jerimizdi baptaý, tazalyq saqtaý jáne tabıǵatty qorǵaýdy úlgi etýdiń tamasha múmkindigi. Onyń ústine osyndaı ortaq jumys adamdardy uıystyrady, - deıdi «Oqjetpes» ESK» AQ jalpy máseleler jónindegi vıtse-prezıdenti Birlik Barjaqsymov.
Óz kezeginde «Býrabaı Damý» JShS mýltımedııalyq ınteraktıvti kesheniniń gıdi Baqytgúl Joldasova da «Taza Qazaqstan» respýblıkalyq ekologııalyq aktsııasy tamasha bastama ekenin jetkizdi.
– Búgin qulshynyspen jumys istedik! Tal egýge, orman alqabyn ulǵaıtýǵa úles qosqan, talmaı eńbektengen adamdar ony eshqashan búldirmeıdi, otamaıdy dep oılaımyn. «Taza Qazaqstan» respýblıkalyq ekologııalyq aktsııasy tamasha bastama dep esepteımin. Osyndaı is-sharalar tabıǵatty aıalap, jaýapkershilikti kúsheıtý úshin adamdardyń kúsh-jigerin biriktiredi, - degen pikirin bildirdi «Býrabaı Damý» JShS mýltımedııalyq ınteraktıvti kesheniniń gıdi Baqytgúl Joldasova.
Al, «Býrabaı» MUTP orman ósirý ınjeneri Álııa Ábdirahmanova ulttyq park ujymy jasyl jelekti alqapty ulǵaıtý jáne orman ósirýdiń keshendi jospary aıasynda jyl saıyn jas shybyqtardy otyrǵyzý jumystaryn júrgizetinin aıtty. Ol sondaı-aq bıylǵy is-sharaǵa erikti kómekshiler kelgenin atap ótti.
2024 jyldyń 8 sáýirinen bastap «Taza Qazaqstan» respýblıkalyq ekologııalyq aktsııasy aıasynda «Býrabaı» memlekettik ulttyq parkiniń 30 qurylymdyq bólimshesiniń birlesken kúshimen kordondarǵa irgeles aýmaqtarda sanıtarlyq tazalaý jumystary júrgizilgenin, 180 tekshe metr qoqys shyǵarylǵanyn aıta ketken jón.
– Qazaqstannyń túkpir-túkpirinde ekologııalyq sharalardy ótkizý jaqsy dástúrge aınalyp kele jatqanyna qýanyshtymyn. Bul, árıne, patrıotızm men durys ekologııalyq tárbıeni qalyptastyrady, - dep atap ótti «Býrabaı» memlekettik ǵylymı-óndiristik kásipornynyń dırektory Sergeı Bykov.
Onyń aıtýynsha, mamyr aıynyń sońyna deıin Ulttyq parktiń Aqylbaı, Býrabaı, Prıozernyı, Zolotobor, Mırnyı, Jalaıyr orman sharýashylyqtarynda taǵy 800 myńǵa jýyq aǵash egiledi. Jańa orman ekpeleriniń jalpy aýdany 104,6 gektarǵa jetedi. Jalpy, jyl sońyna deıin Ulttyq park ujymy 832,2 myń aǵash otyrǵyzýdy josparlap otyr.
