Býrabaı kýrortynyń biryńǵaı sáýlet kelbeti qalyptastyrylýda
KÓKShETAÝ. QazAqparat - Aqmola oblysynda Býrabaı kýrortynyń biryńǵaı sáýlet kelbeti qalyptastyrylatyn bolady, dep habarlaıdy QazAqparat tilshisi.
«Aqmola oblysynyń injý-marjany - Býrabaı kýrortynyń biryńǵaı sáýlet kelbetin qalyptastyrý boıynsha jumystar atqarylýda. Ortalyq alańda abattandyrý jumystary joǵary qarqynmen júrgizilýde. Onyń ishinde jol jıegine beder tastar tóselip, gúlzarlar otyrǵyzý jumystary aıaqtalýǵa jaqyn qaldy. Sondaı-aq, qazirgi zamańǵy talaptarǵa saı tamaqtaný oryndary ashylýda», - dep jazdy oblys ákimi Málik Myrzalın Feısbýktegi jeke paraqshasynda.
Sonymen qatar, aımaq basshysy aldaǵy ýaqytta qoǵamdyq tamaqtaný oryndary da kóptep ashylatynyn atap ótti.
«Jaqyn kúnderi kýrorttyq aımaqta týrıster arasynda suranysqa ıe 20-dan astam street food pavılıondaryn ashý josparda bar. Qazirdiń ózinde ortalyq jaǵajaıǵa aparatyn alleıanyń boıynda Býrabaıǵa demalýǵa kelgen alǵashqy týrısterdi kezdestirýge bolady. Jaryqtandyrylǵan kóshelerdiń boıynda ornatylǵan oryndyqtarda aqparattyq baǵyt-baǵdarlar men «I love Burabay» belgisi qoıylǵan. Munda jol, ǵımarattardyń syrtqy kelbeti qalpyna keltirilip, mańaıy abattandyrylýda», - deıdi ákim.
