Býrabaı kýrorttyq aımaǵynda kólderdi tazartý 2015 jyly júzege asady

ASTANA. QazAqparat - Kelesi jyldan bastap, Şýche-Býrabaı kýrorttyq aımaǵynyń sý kózderin sanatsııalaý (jaqsartý, tazartý) jumystary bastalady. Bul týraly búgin Májilistiń Ekologııa jáne tabıǵatty paıdalaný komıtetiniń keńeıtilgen otyrysynda Energetıka vıtse-mınıstr Talǵat Ahsambıev málim etti.

Eske salaıyq, komıtet otyrysynda «Şýche-Býrabaı kýrorttyq aımaǵynyń sý kózderin sanatsııalaý jáne Sorbulaq sarqyndy sýlar jınaqtaýshy kólin rekonstrýktsııalaý» máselesi talqylanǵan bolatyn.

Vıtse-mınıstrdiń aıtýynsha, Úkimet qaýlysymen bekitilgen jospar boıynsha Şýche-Býrabaı kýrorttyq aımaǵyn damytýdyń 2014-2016 jyldarǵa arnalǵan ekinshi kezeńin júzege asyrý is-josparlary bekitilgen. Toqtala ketetin jaıt, atalǵan jospar Elbasynyń Joldaýyn iske asyrý, sheteldik jáne otandyq ınvestorlar úshin tartymdy ınvestıtsııalyq ahýal jasaý, Aqmola oblysyna týrıster aǵynyn qamtamasyz etý maqsatyn kózdeıdi. Al jospardaǵy eń mańyzdy baǵyttardyń biri - Şýche-Býrabaı kýrorttyq aımaǵynyń sý aıdyndaryn, ıaǵnı Şýche, Býrabaı, Qarasý kólderin tazalaý.

«Şýche-Býrabaı kýrorttyq aımaǵynyń sý aıdyndaryn, Şýche, Býrabaı, Qarasý kólderin tazalaý men sanatsııa jobasynyń jobalyq-smetalyq qujattamasy ázirlendi. Ol boıynsha aǵymdaǵy jyldyń tamyz aıynda 5 mlrd. 9 mln. teńge qarajat bólingen. Jobanyń aıaqtalý merzimi 2016 jylǵa belgilenip otyr. Negizgi jumys keler jyldyń sáýirinen bastalady dep josparlanyp otyr. Kólderdi mehanıkalyq tazartýdan bólek olardy ekinshi márte qaıtadan lastanýyna jol bermeıtin jabdyqtar qamtylyp, arnaıy transheıalar qazylady, tıisti ýchaskeler kógaldandyrylyp, sýdy bıologııalyq tazartý sharalary qamtylady», - dedi T. Ahsambıev.