Býrabaı kýrorttyq aımaǵyn damytýǵa 61,3 mlrd teńge jumsalady
ASTANA. QazAqparat - Şýche-Býrabaı kýrorttyq aımaǵyn damytýǵa 61,3 mlrd teńge jumsalady. Bul týraly búgin Úkimettiń selektorlyq rejimdegi otyrysynda Astana qalasy men Şýche-Býrabaı kýrorttyq aımaǵyn damytý josparyn tanystyrǵan QR Mádenıet jáne sport mınıstri Arystanbek Muhamedıuly aıtty, dep habarlaıdy QazAqparat.
«Astana qalasynyń týrıstik klasterin, onyń ishinde medıtsınalyq, mádenı bilim berý jáne iskerlik týrızmdi, Şýche-Býrabaı kýrorttyq aımaǵyn damytý boıynsha jol kartasy ázirlendi. Astana qalasynda densaýlyq saqtaý, joǵary bilim berý, mádenıet pen sport nysandaryn paıdalaný tıimdiligin jáne ózin ózi óteýin arttyrý sharalaryn ázirleý jónindegi Elbasynyń tapsyrmasyn oryndaý maqsatynda biz Qazaqstan Úkimetiniń tıisti sheshimderin daıyndadyq», - dedi mınıstr.
Onyń dereginshe, Şýche-Býrabaı kýrorttyq aımaǵyn damytýdyń 2017-2020 jyldarǵa arnalǵan jospary 4 bólim jáne 33 is-sharadan turady. Onyń ishinde ınfraqurylymdyq jáne ekologııalyq máselelerdi sheshý boıynsha 17, kólik-logıstıka ınfraqurylymyn damytý boıynsha 5, qaýipsizdikti qamtamasyz etý boıynsha 6, aımaqtyń týrıstik áleýetin damytý boıynsha 5 shara kózdelgen.
«Şýche-Býrabaı kýrorttyq aımaǵyn damytý sharalaryn iske asyrýǵa 61,3 mlrd teńge kóleminde qarjylandyrý kózdelgen. Onyń ishinde respýblıkalyq bıýdjet 58,2 mlrd teńge, jergilikti bıýdjet 3,1 mlrd teńge qarastyrylǵan», - dedi Muhamedıuly.
