Býrabaı kýrortyn damytý josparyna 137 mıllıard teńge bólindi
ASTANA. KAZINFORM – Býrabaı kýrorttyq aımaǵyn damytý úshin 2025-2029 jyldarǵa arnalǵan keshendi jospar bekitildi, onda 137 mıllıard teńgege 118 is-shara júrgizý qarastyrylǵan. Jospar týraly Aqmola oblysynyń ákimi Marat Ahmetjanov Úkimet otyrysynda tolyǵyraq aıtyp berdi.
− Býrabaı kýrorty halyqaralyq iskerlik, sporttyq jáne mádenı-buqaralyq is-sharalardy tartý ortalyǵyna aınalýy kerek. Ol tıisti ınfraqurylymdy talap etedi. Sondyqtan basty 34 ınjenerlik jáne kóliktik jobalar aıqyndaldy. Nátıjesinde 400 km sýmen jabdyqtaý, sý burý jáne jylýmen jabdyqtaý júıeleri, 116 km elektr jelileri jáne 80 km avtomobıl joldaryna rekonstrýktsııa jasalady, − dedi M.Ahmetjanov óz baıandamasynda.
Kýrorttyń sanıtarııalyq jaǵdaıy da erekshe baqylaýda, munda 15 sanıtarııalyq-gıgıenalyq torap qosymsha satyp alyndy. Jyl sońyna deıin memlekettik-jekeshelik áriptestikpen qoqys suryptaý jáne qatty turmystyq qaldyqtardy óńdeý kesheni salynady.
Ár jyly Şýchınsk-Býrabaı kýrorttyq aımaǵyna 20 mlrd teńgege deıin jeke ınvestıtsııalar tartý josparlanyp otyr. Nátıjesinde osy salada jumyspen qamtylǵandar sany 22 myńnan 32 myń adamǵa deıin ulǵaıady.
Sonymen birge, bıyl akvaparki jáne demalys úıleri bar «Dolche baı Ýındem» oteli, «Býrabaı Grand Vılledj» kottedj qalashyǵy salynyp, «Abylaı Han» qonaq úıi rekonstrýktsııalanady.
− Týrıstik servıs pen demalý jaǵdaıyn jaqsartý úshin bıyl 9 sholý alańy men 14 týrıstik marshrýt jasalady, Şýche kóliniń jaǵajaıy abattandyrylady. Şýche qalasyndaǵy dendroparkti rekonstrýktsııalaý bastalady. Kópbeıindi kongress ortalyǵy da mańyzdy týrıstik obektilerdiń birine jáne Býrabaıdyń aqmarjanyna aınalýy qajet. Qazirgi ýaqytta jer ýchaskesi belgilendi jobany ázirleý jumysy bastaldy, − dedi oblys ákimi.
Sonymen qatar bıyl kýrorttyq aımaqta jasandy ıntellektpen jabdyqtalǵan 114 beınebaqylaý kamerasy ornatylady. Ol týrısterdiń qaýipsizdigi úshin qosymsha múmkindik beredi.
Uıaly baılanys pen mobıldi ınternettiń sapasyn jaqsartý maqsatynda, Şýchınsk-Býrabaı kýrorttyq aımaǵynda qosymsha 7 antenna-dińgekti qurylys ornatyldy. Jazǵa deıin olarda mobıldi operatorlar ornalastyrylatyn bolady.
− Óńirdiń týrıstik áleýetin tanymal etý jáne damytý úshin «Four season» tujyrymdamasy iske asyrylyp jatyr. Bıyl 25 iri halyqaralyq jáne respýblıkalyq is-sharalar qarastyrylǵan. «Burabay Travel» mobıldi qosymshasynyń kontenti tolyǵyp keledi, ol týrıstik klaster týraly aqparat alýǵa múmkindik beredi, − dedi Marat Ahmetjanov.
Buǵan deıin «Astana Kontsert» kompanııasynyń prodıýseri Málik Hasenov amerıkalyq aktrısa jáne ánshi Djennıfer Lopestiń Astanada ótetin kontsertinen qansha ekonomıkalyq paıda túsetinin aıtyp berdi.