Býrabaı kýrorty týrısterdi nesimen tartady
ASTANA. KAZINFORM – Býrabaı degende oıǵa saf taza aýa, qylqan japyraqty orman men kógildir kólder oralady. Qazaqstannyń injý-marjany sanalatyn kýrort taǵy nesimen tartymdy?
- 2024 jyldyń qorytyndysyn shyǵara otyryp, Býrabaı kýrortynda ınfraqurylymdy damytý men servısti jaqsartýǵa baǵyttalǵan mańyzdy jobalardyń sátti iske asyrylǵanyn atap ótýge bolady. Bul jetistikter onyń zamanaýı týrıstik ortalyq retindegi mártebesin nyǵaıtýǵa múmkindik berdi, - deıdi «Býrabaı Damý» JShS ókilderi.
Seriktestik málimetterine sáıkes, ótken jyly birqatar is-shara atqarylǵan.
«PIKEMAN 2024» jarysy
20 shildede 3 shaqyrymdyq sýda júzý jarysyna 300-den astam áýesqoı qatysty. Bul shara sportshylar men kórermenderdiń nazaryn aýdaryp, sýdaǵy belsendi demalysty tanymal etti.
Mýltımedıalyq ınteraktıvti keshen jańartyldy
24 shildede vırtýaldy jáne tolyqtyrylǵan shynaıylyq tehnologııalaryn paıdalanatyn keshenniń ashylýy ótti. Alty aıdyń ishinde keshendi 7 466-dan astam adam, onyń ishinde áleýmettik osal toptaǵy 2 myń qonaq tamashalady.
«AQBURA BAY TRAIL-4» júgirý saıysy
3 tamyzda 11 elden kelgen 1 200 júgirýshiniń qatysýymen halyqaralyq júgirý saıysy ótti. Qatysýshylar «Býrabaı» ulttyq parkiniń kórikti jerlerin qamtıtyn marshrýtty baǵyndyrdy.
Qyrǵyz elinen jýrnalıster keldi
12-13 qazanda Qyrǵyzstannan kelgen 40 jýrnalıske arnalǵan tanystyrý týry uıymdastyryldy. Týr barysynda «Abylaı han alańy», «Kók shyǵanaq» jáne maral sharýashylyǵy syndy aımaqtyń negizgi nysandary kórsetildi.
Şýchınsk qalasyndaǵy muz qalashyǵy
Qysqy maýsymǵa oraı muz qalashyǵy daıyndalyp, munda konkı jáne tıýbıng jalǵa berý qyzmetteri, sondaı-aq demalýshylarǵa arnalǵan fastfýd aımaqtary usynyldy.
Qysqy maýsymnyń ashylýy jáne BurabayLand
14 jeltoqsanda qysqy maýsym saltanatty túrde ashylyp, jańa BurabayLand oıyn-saýyq nysany tanystyryldy. 700-den astam qonaq merekelik baǵdarlama men ot-shashý shoýyna tamashalap, jańajyldyq bı keshine qatysty.
Aımaq týrızmine áseri
- Barlyq is-shara «Býrabaı Damý» JShS-niń qoldaýymen júzege asyryldy. Bul bastamalar Býrabaı kýrortynyń zamanaýı týrıstik baǵyt retindegi mártebesin nyǵaıtty, - deıdi seriktestik mamandary.
Aıta ketsek, byltyr ótkizilgen is-sharalardyń medıalyq qamtylýy 5 mıllıonnan astam adamdy qamtydy. Infraqurylymdy damytý týrısterdiń barlyq sanaty – otbasylar, jastar jáne sheteldikter úshin demalysty jaıly etýge baǵyttalǵan.
Oqı otyryńyz, Býrabaıda qandaı týrıstik oryndarǵa barýǵa bolady.