Býrabaı kóline 150 myń aq amýr jiberiledi
ASTANA. KAZINFORM – Býrabaı kólinde 2027 jyly engizý josparlanǵan «ekologııalyq tynyshtyq» rejımine kezeń-kezeńimen daıyndyq bastaldy.
Onyń maqsaty — kól akvatorııasyna túsetin júktemeni azaıtyp, ekojúıeniń tabıǵı jolmen qalpyna kelýine jaǵdaı jasaý. Osy jumystyń bir kezeńi — kóldi aq amýrmen balyqtandyrý. Bıyl kúzde Býrabaı kóline 150 myń birjyldyq aq amýr jiberiledi.
Kóldi qalpyna keltirý qajettigin «Býrabaı» MUTP bastamasymen júrgizilgen ǵylymı zertteýler de rastaıdy. Mamandar negizgi máselelerdiń biri retinde sý ósimdikteriniń shamadan tys kóbeıýin atap ótedi. Tirshiligin toqtatqannan keıin olar ydyrap, sýda erigen ottegin tutynady. Bul úderis ásirese qysta, kóldiń betin muz basyp, tabıǵı ottegi almasýy shektelgen kezde aıqyn seziledi.
— Balyqtandyrýdyń birinshi kezeńi 22 qyrkúıekte ótti, ekinshi kezeńi 5 qazanǵa josparlanǵan. Aq amýrdyń tańdalýy kezdeısoq emes. Ol sý ósimdikterimen qorektenip, olardyń shamadan tys ósýin tabıǵı jolmen tejeýge kómektesedi. Bul rette bizdiń maqsatymyz — kóldi ósimdikterden tolyq tazartý emes, tabıǵı tepe-teńdikti qalpyna keltirý, — deıdi «Býrabaı» MUTP ınjener-ıhtıology Sergeı Kýcherenko.
Balyqtandyrýdan keıin kóldiń jaı-kúıi turaqty ǵylymı baqylaýda bolady. 2027 jyly jáne odan keıingi jyldary mamandar sýdyń sapasyn, sý ósimdikteri men mıkroorganızmderdiń jaı-kúıin zertteýdi jalǵastyrady, al qys mezgilinde sýdaǵy otteginiń mólsherin baqylaıdy. Alynǵan derekter ekojúıedegi ózgeristerdi baǵalaýǵa jáne aldaǵy ýaqytta qandaı sharalar qajet ekenin anyqtaýǵa múmkindik beredi. Baqylaý kezeńinde áýesqoılyq jáne sporttyq balyq aýlaýǵa arnalǵan joldamalardy satý ýaqytsha toqtatylady.
Alaıda kóldi qalpyna keltirý onyń bıologııalyq jaı-kúıine ǵana baılanysty emes. Turaqty nátıjege qol jetkizý úshin akvatorııaǵa túsetin syrtqy júktemeni de qatar azaıtý qajet. Jańa rejımge kóshý kezeń-kezeńimen júzege asyrylady.
Bul baǵyttaǵy alǵashqy qadam jasaldy. Bıyl Býrabaı kólinde elektrli sý kóligin synaqtan ótkizý bastaldy. Jańa model kólge de, ulttyq park aýmaǵyna da túsetin júktemeni azaıtýǵa baǵyttalǵan.
Aıta ketelik Kaspııde balyq ósirile bastady: Mańǵystaýda alǵashqy ónim qyrkúıekte alynady.
