Býrabaı kólinde 3 adam sýdan qutqaryldy
KÓKShETAÝ. QazAqparat - Aqmola oblysynyń Býrabaı kólinde 3 adam sýdan qutqaryldy, dep habarlaıdy QazAqparat tilshisi aýmaqtyq TJD baspasóz qyzmetine silteme jasap.
Vedomstvonyń málimetinshe, kezekti reıd kezinde Býrabaı kentindegi qutqarý bólimshesiniń qyzmetkerleri Býrabaı kólinde jaǵalaýdan 750 metr qashyqtyqta aýdarylǵan katamaran men sýǵa batyp bara jatqan 3 adamdy baıqap qalǵan.
«Ekpindi jel men nóser jańbyr saldarynan tolqyn kóterildi. Tabıǵattyń qatal minezine qaramastan qutqarýshylar úsh adamdy da qutqaryp, jaǵaǵa alyp shyqty. Keıin olarǵa sýǵa túsken kezde qaýipsizdik erejelerin esten shyǵarmaý týraly keńes berildi», - deıdi vedomstvonyń baspasóz qyzmeti.
Aıta ketý kerek, shomylý maýsymy bastalǵaly beri qutqarýshylar otrıady 92 adamdy qutqardy. Onyń 21-i - kámelet jasyna tolmaǵandar. Al, dáriger tarapynan demalýshylarǵa 84 túrli medıtsınalyq kómek kórsetildi.
