Býrabaı kólderinde kvadrotsıklmen júrýge tyıym salyndy

ASTANA. KAZINFORM – Bıyl 1 qańtar men 5 aqpan aralyǵynda tyıymǵa qaramastan Býrabaı kólinde kvadrotsıklmen júrýdiń 8 faktisi tirkeldi.

«Býrabaı» memlekettik ulttyq tabıǵı parki Aýyl sharýashylyǵy mınıstriniń 2010 jylǵy 1 qyrkúıektegi №555 buıryǵymen bekitilgen «Jeke tulǵalardyń erekshe qorǵalatyn tabıǵı aýmaqtarda bolý qaǵıdalaryna» sáıkes, Býrabaı kóliniń muz betinde kvadrotsıklmen júrýge tyıym salynǵanyn habarlaıdy.

Osylaısha, ulttyq park kólde atalǵan bıznes túrine ruqsat joǵyn eske salady. Kólder mańynda «Kólge kirýge tyıym salynady» degen aqparattyq taqtalar ornatylǵan. 

Odan bólek, kún saıyn ulttyq parktiń ınspektorlyq quramy Býrabaı aýdandyq polıtsııa bóliminiń ókilderimen birlesip, tabıǵat qorǵaý zańnamasynyń buzylýyna jol bermeý úshin reıd júrgizedi. 

- Bıyl 1 qańtar men 5 aqpan aralyǵynda jalpy qoldanystaǵy joldan Býrabaı kóliniń muzaıdynyna kvadrotsıklder shyǵyp ketýine baılanysty 8 fakti tirkeldi. Kólik quraldary tárkilenip, ıelerine ákimshilik aıyppul salyndy. «Býrabaı» park ujymy ulttyq saıabaqqa kelýshilerden tabıǵatqa janashyrlyq tanytýdy, yqtııatpen qaraýdy suraıdy, - delingen habarlamada. 

Tabıǵat qorǵaý zańnamasyn buzý faktilerine kýá bolǵan jaǵdaıda, parktiń jedel basqarý ortalyǵyna 8 (716 36) 7 - 17 – 15 baılanys telefony arqyly habarlasýǵa bolady. 

Taıaýda «Býrabaı» ulttyq parkindegi kólderde aeratsııa jumysy bastalǵany týraly habarlaǵan edik. Atalǵan protsess sýdy ottegimen qanyqtyrady jáne sý obektileriniń ekojúıesin saqtaýǵa kómektesedi.