Býrabaı kólderinde aeratsııa jumystary júrip jatyr
KÓKShETAÝ. KAZINFORM – «Býrabaı» memlekettik ulttyq tabıǵı parki aýmaǵyndaǵy sý aıdyndarynda balyqtar men ózge de sý organızmderin ottegimen qamtamasyz etý úshin aeratsııa jumystary qolǵa alyndy.
Sý aıdyndarynda turaqty muz jamylǵysy paıda bolǵanda sýǵa ottegi ótpeı qalady. Osyǵan baılanysty ıhtıofaýnada gıpoksııanyń (aǵzadaǵy otteginiń tómendeýi) paıda bolý qaýpi týyndaıdy, bul óz kezeginde olardyń jappaı qyrylýyna ákelýi múmkin.
«Býrabaı» MUTP baspasóz qyzmetinen atap ótkendeı, osyndaı jaǵdaılardyń aldyn alý maqsatynda saıabaq aýmaǵyndaǵy sý aıdyndarynyń jaı-kúıine monıtorıng júrgiziledi. Parktiń ǵylym, aqparat jáne ekologııalyq monıtorıng bólimi ár 10 kún saıyn Úlken shabaqty jáne Kishi shabaqty, Býrabaı, Shortandy sııaqty kólderdiń sý quramyna gıdrohımııalyq baqylaýlar júrgizedi. Sýdan synamalar alynady. Jedel taldaý arqyly sýdyń quramyndaǵy hımııalyq kórsetkishterdi anyqtaıdy, onyń ishinde sýtegi rN, ottegi mólsheri bar.
«Aeratsııa sýdaǵy otteginiń jetkilikti deńgeıin saqtaýǵa kómektesedi, bul balyqtar men basqa sý organızmderiniń tirshiligi úshin mańyzdy. Otteginiń azdyǵy anyqtalǵan jaǵdaıda janýarlar dúnıesin qorǵaý jáne ósimin molaıtý bólimi balyq resýrstaryn saqtaý úshin aerotsıondy jumystar júrgizedi. Muzda oıyqtar burǵylanady, sodan keıin sý osy oıyqtardan motopompanyń tútigimen muzda daıyndalǵan naýaǵa aıdalady. Odan ári muz arqyly 5-6 metr aǵyp, kólge qaıta quıady, bul rette sýdan zııandy gazdar shyǵyp, bir mezgilde ottegimen qanyqtyrylady», — dep túsindirdi ıhtıolog-ınjener Maksım Pak.
Aýa raıynyń qolaısyzdyǵyna qaramastan, Júkeı kólinde aeratsııalyq is-sharalar júrgizildi. Bul kól taıyz bolǵandyqtan onda ottegi mólsheri óte az.
Monıtorıng qorytyndysy boıynsha qajet bolǵan jaǵdaıda aeratsııa basqa sý aıdyndarynda da júrgiziledi.
Jalpy, qysta sý obektilerin aeratsııalaý sý resýrstarynyń ekojúıesin saqtaýda jáne balyqtar men basqa da sý organızmderiniń ómir súrýine qolaıly jaǵdaı jasaýda mańyzdy ról atqarady.
Aıta ketsek, budan buryn oqýshylar «Býrabaı» ulttyq parkinde qustarǵa jem salatyn astaýlar ornatqanyn jazǵan edik.
