Býrabaı kólderi beınebaqylaý kameralarynyń kómegimen baqylanady

KÓKShETAÝ. KAZINFORM - «Býrabaı» memlekettik ulttyq tabıǵı parkiniń sý aıdyndaryn baqylaý úshin aqyldy beınekameralar ornatylyp jatyr.

«Býrabaı» MUTP baspasóz qyzmetiniń málimetinshe, sý aıdyndaryn qorǵap, ıhtıofaýnany saqtaý úshin ulttyq park dırektsııasy qosymsha sharalar qabyldap jatyr. Smart National Park Burabay aqyldy tehnologııalaryn damytý aıasynda ulttyq park kólderiniń jaǵasynda beınebaqylaý júıeleri ornatyla bastady.

Beınebaqylaý kamerasyn ornatýdy balyqshylar jıi baratyn Jókeı kólinen bastaý týraly sheshim qabyldandy. Óıtkeni, munda zańsyz balyq aýlaý derekteri jıi tirkeledi.

Bıyl Ulttyq park aýmaǵyndaǵy kólderde balyq resýrstaryna zańsyz qol suǵý derektiniń jeteýiniń tórteýi dál osy kólde boldy. Quryqqa ilinen quqyq buzýshylar qylmystyq jaýapqa tartyldy, brakonerlerdiń is-áreketinen kelgen jalpy shyǵyn 2,5 mıllıon teńgeni qurady.

SMART-júıe sý aıdynyndaǵy jaǵdaıdy ońtaıly baqylaýǵa jáne zańsyz áreketterdiń jolyn kesýge múmkindik beredi. Optıkalyq kameralar naqty ýaqyt rejıminde kól akvatorııasy men jaǵalaý aımaǵyn úzdiksiz baqylaıdy.

«Kólderde zamanaýı beınebaqylaý tehnologııalaryn engizý ıhtıofaýnany saqtaýdy qamtamasyz etip qana qoımaıdy, sonymen qatar jartastardy búldiretinderge, qoqys tastaıtyndarǵa da tosqaýyl bolady. Kelesi jyly Shortan kóline ornatamyz. Birte-birte Smart National Park Burabay aqyldy tehnologııalary saıabaqtaǵy alty iri kóldiń barlyǵyn baqylaýǵa alady», - dedi «Býrabaı» MUTP dırektory Sergeı Bykov.

Kameralar ornalasqan munaralar jel generatoryn, kún panelin jáne dızel generatoryn qosa alǵanda, derbes qýat kózderimen jabdyqtalady, sol arqyly úzdiksiz jumys isteıdi.

Jókeı kólindegi beınebaqylaý júıesi kúzdiń sońyna deıin ornatylady.

Aıta ketsek, budan buryn «Býrabaı» ulttyq parki aýmaǵyndaǵy kólderdiń jaǵalaýy tazartylǵanyn jazǵan edik.